Shtetet e Bashkuara po shqyrtojnë pasojat për Arabinë Saudite pas vendimit të OPEC+ për të ulur prodhimin e naftës, tha Sekretari amerikan i Shtetit Antony Blinken.
“Jo vetëm që jemi thellësisht të zhgënjyer, por mendojmë se është dritëshkurtër. Dhe siç e ka bërë shumë të qartë presidenti [SHBA Joe Biden], ai vendim duhet të ketë pasoja dhe kjo është diçka që ne po shikojmë”, tha ai.
Ai vuri në dukje se sauditët kishin përcjellë privatisht dhe publikisht në SHBA synimin e tyre për të ulur prodhimin e naftës, duke thënë se ata e dinin se kjo do të rriste të ardhurat ruse.
“E kemi bërë të qartë se ky do të ishte drejtimi i gabuar. Bazuar vetëm në këtë, ndikimi që mund të ketë në sanksionet, por edhe sepse jemi në një rimëkëmbje ekonomike globale”, tha Blinken.
Riadi “punoi në prapaskenë”
Ai shtoi se sauditët nuk kishin paraqitur një bazë tregu për shkurtimet e prodhimit dhe se SHBA sugjeroi që “ata duhet të presin dhe të shohin nëse janë të shqetësuar për një rënie të konsiderueshme të çmimeve dhe nëse qëllimi i tyre është të mbajnë çmimet në një nivel të caktuar.”
Më herët, Shtëpia e Bardhë tha se vendimi i OPEC+, një organizatë e kryesuar nga Arabia Saudite, për të reduktuar në mënyrë dramatike prodhimin global të naftës përbënte “mbështetje morale dhe ushtarake” për luftën e Rusisë kundër Ukrainës.
Uashingtoni vazhdon të jetë i zemëruar me Arabinë Saudite për mbështetjen e një shkurtimi të prodhimit në vendet e organizatës me dy milionë fuçi në ditë, duke thënë se Riadi “punoi prapa skenave për të ushtruar presion ndaj anëtarëve të kartelit për të votuar për vendimin, duke e ditur se do të përfitojë Rusia”.
Vendimi i OPEC+ rriti çmimet globale të naftës, një burim kryesor i të ardhurave për Kremlinin, ndërsa Perëndimi dhe aleatët përpiqen të reduktojnë aftësinë e Rusisë për të zhvilluar luftë kundër Ukrainës, e cila filloi në shkurt. /tesheshi.com/
