Një zemërgjerësi tipike qeveritare në prag të zgjedhjeve, është gati të shpërthejë me një amnisti karshi atyre që në fakt kjo qeveri nuk njeh “mëshirë”: debitorët e taksave dhe gjobave.
Bëhet fjalë për detyrime fiskale të papaguara nga biznesi dhe individët, që i përkasin periudhës para 31 dhjetorit të vitit 2010, të cilat do të falen plotësisht.
duke iu referuar Top Channel-it që ka zbardhur draftin përfundimtar të qeverisë, aty parashikohet që të gjitha detyrimet e lindura para 31 dhjetorit 2010 të falen plotësisht, pavarësisht llojit të tyre, përveç kontributeve të sigurimeve shoqërore dhe atyre shëndetësore. Për këtë kategori falen vetëm gjobat dhe kamatëvonesat.
“Por çfarë ndodh me detyrimet e mëvonshme?”, thotë Top Chanel, ku më pas sqarohet se: sipas projektligjit, për detyrimet që i përkasin periudhës nga 1 janari 2011 deri në 31 dhjetor 2014 do të falen të gjitha gjobat dhe kamatëvonesat, me kushtin që biznesi apo individi të paguajë të plotë detyrimin fillestar.
Ndërsa për dy vitet e fundit, 2015-2016 nuk do të ketë asnjë falje taksash, përveç një grupi shumë specifik detyrimesh, që biznesit i janë ngarkuar për fajin e administratës.
Këto janë detyrimet për bizneset e çregjistruara para hyrjes në fuqi të këtij ligji, si dhe gjobat ndaj 31 mijë bizneseve që u vendosën gabim nga sistemi i Tatimeve në verën e kaluar.
Po kështu, përmes këtij drafti parashikohet falja edhe e gjobave për vonesat në dorëzimin e pasqyrave financiare, apo destinimit të fitimit, si dhe gjobat e vendosura me ligjin e ashpër të procedurave tatimore, i cili më pas u rrëzua nga Gjykata Kushtetuese.
Ndërsa detyrimet për të cilat bizneset janë dënuar me vendim të formës së prerë nga gjykata nuk falen, por do të paguhen plotësisht.
Këto lloj amnistish janë diçka e zakonshme në çdo pragzgjedhjesh. Dhe debitorët e ndryshëm, duke e diktur këtë mesele të politikës, bëjnë ç’bëjnë dhe i vonojnë me kast shlyerjen e detyrimeve, derisa të afrohen ndonjë palë zgjedhje dhe qeveria të shpallë amnisti. As Rama nuk i iku dot kësaj force zakoni, ndonëse njihet si qeveria që të rrjep, kur është fjala për detyrime ndaj shtetit. /tesheshi.com/
