Presidenti ukrainas Volodymyr Zelensky u bëri thirrje shkrimtarëve nga e gjithë bota, duke iu drejtuar pjesëmarrësve në Panairin e Librit të Frankfurtit, të “përshkruajnë terrorin e imponuar nga Rusia” në veprat e tyre, raporton AFP.
“Në vend që të sjellë kulturë, Rusia sjell vdekjen”, tha Zelensky në një fjalim përmes lidhjes video në një nga panairet kryesore të librit në botë.
Për shkak të njohjes së pamjaftueshme të gjërave në disa sfera, shtoi ai, ka ende justifikime për presidentin rus Vladimir Putin.
“Duhet thënë sinqerisht: ka ende shumë figura publike në Evropë që flasin për ‘kuptimin’ e Rusisë. Këta persona janë të pranishëm në sfera të ndryshme – politikë, biznes, organizata joqeveritare dhe media. Si është e mundur? Përgjigja e vetme është mungesa e njohurive”, arsyetoi Zelensky.
“Unë po ju kërkoj, ju lutem, të bëni gjithçka që mundeni për t’i bërë njerëzit të vetëdijshëm për terrorin që po sjell Rusia në Ukrainë”, tha udhëheqësi ukrainas dhe vuri në dukje se “dija është përgjigja ndaj veprimeve të Rusisë, dhe përgjigje janë gjithashtu librat, skenaret, artikujt…” .
Në Panairin e Librit të Frankfurtit këtë vit, Ukraina dhe autorët e saj, shumë prej të cilëve erdhën në Gjermani pavarësisht vështirësive, janë në plan të parë. Pajisjet dhe librat duhej të silleshin me makina dhe kamionë, dhe nën sulmet ruse ishte e vështirë të nxirreshin nga Kievi, kujton Instituti Ukrainas i Librave.
Në stendën e Ukrainës, ekspozohet diversiteti i industrisë botuese të vendit dhe është vendosur një skenë mbi të cilën ndizet një dritë e kuqe kur bien sirenat për alarmin në Ukrainë.
Institucionet shtetërore ruse, zakonisht përgjegjëse për qëndrimin e vendit të tyre, u ndaluan të marrin pjesë në Frankfurt këtë vit. /tesheshi.com/
