Presidenti ukrainas Volodymyr Zelensky, në një fjalim të fundit mbrëmë, akuzoi Rusinë për një luftë energjetike kundër Evropës dhe bëri thirrje për unitet.
“Rusia kohët e fundit është përpjekur të rrisë edhe më shumë presionin energjetik mbi Evropën; transporti i gazit përmes Nord Stream është ndalur plotësisht”, tha Zelensky. “Rusia dëshiron të shkatërrojë jetën normale të çdo evropiani – në të gjitha vendet e kontinentit tonë.”
Qëllimi i Moskës, tha ai, është të dobësojë dhe frikësojë shtetet e Evropës. Përveç tankeve dhe raketave, Rusia përdor edhe energjinë si “armë” dhe këtë dimër po përgatitet të japë një “goditje vendimtare” në sektorin e energjisë dhe vetëm një unitet i madh do të lejojë që kjo skemë të sfidohet, vazhdoi lideri ukrainas.
Evropianët duhet të koordinojnë më mirë kundërmasat e tyre dhe të ndihmojnë njëri-tjetrin, tha ai, duke shtuar se presioni mbi Rusinë duhet të rritet për të kufizuar të ardhurat e saj nga nafta dhe gazi.
Sfondi i këtyre akuzave është se Gazprom nuk rifilloi dërgesat e gazit përmes Nord Stream 1 dje në mëngjes siç ishte planifikuar. Kompania ruse e energjisë përmendi një rrjedhje në stacionin e kompresorit Partovaya. /tesheshi.com/
