Presidenti i Ukrainës, Volodymyr Zelensky, prezantoi në Bali planin e tij prej 10 pikash për paqen me Rusinë.
Njeriu i parë i Ukrainës tha se nuk do të ketë marrëveshje Minsk 3 për t’i dhënë fund luftimeve në Ukrainë.
Plani i paqes prej 10 pikash i Zelensky-t është:
Siguria nga rrezatimi dhe armët bërthamore;
Siguria e ushqimit;
Siguria energjetike;
Lirimi i të burgosurve;
Zbatimi i Kartës së OKB-së;
Tërheqja e trupave ruse dhe ndërprerja e armiqësive;
Drejtësia;
Ekocidi dhe mbrojtja e mjedisit;
Parandalimi i përshkallëzimit;
Konfirmimi i përfundimit të luftës.
Më herët, ai tha në një fjalim me video-lidhje drejtuar liderëve botërorë të mbledhur në samitin e G20 në Indonezi se tani është koha për të ndaluar luftën e Rusisë në vendin e tij, sipas planit të tij të propozuar të paqes.
“Jam i bindur se tani është koha kur lufta shkatërruese e Rusisë duhet dhe mund të ndalet”, tha Zelensky.
“Ekziston një formulë ukrainase për paqen. Paqe për Ukrainën, Evropën dhe botën. Dhe ka një sërë zgjidhjesh që mund të zbatohen për të garantuar realisht paqen”.
Ai tha se Rusia duhet të konfirmojë integritetin territorial të Ukrainës, të tërheqë trupat e saj nga territori ukrainas dhe të paguajë kompensim për dëmin e shkaktuar.
Lufta duhet të përfundojë “drejtësisht dhe në bazë të Kartës së OKB-së dhe ligjit ndërkombëtar”, tha presidenti ukrainas. Ai bëri thirrje për rivendosjen e “sigurisë nga rrezatimi” në lidhje me termocentralin bërthamor të Zaporozhyes, futjen e kufijve të çmimeve për burimet e energjisë ruse dhe zgjerimin e nismës për eksportin e grurit, si dhe lirimin e të gjithë të burgosurve ukrainas.
“Ju lutemi zgjidhni rrugën tuaj të lidershipit dhe së bashku ne me siguri do të zbatojmë formulën e paqes,” u tha ai pjesëmarrësve të samitit.
Kujtojmë se Rusia e quan veprimin e saj në Ukrainë një “operacion special” për të çarmatosur Ukrainën dhe për ta mbrojtur atë nga fashistët. Ukraina dhe Perëndimi thonë se akuzat janë të pabaza dhe se lufta është një akt agresioni i paprovokuar.
Pasi Rusia njoftoi se Presidenti Vladimir Putin ishte shumë i zënë për të marrë pjesë, ajo u përfaqësua në samitin e G20 nga Ministri i Jashtëm Sergei Lavrov. /tesheshi.com/
