Presidenti ukrainas Volodymyr Zelensky tha të premten në Parlamentin francez se Evropa është një kontinent në luftë dhe se Rusia nuk do ta ndalë agresionin e saj në kufijtë e Ukrainës.
“Ne jetojmë në një kohë kur Evropa, për fat të keq, nuk është më një kontinent paqeje,” tha Zelenski në një fjalim para përfaqësuesve francezë.
“Edhe një herë, qytetet evropiane po shkatërrohen dhe fshatrat po digjen”, tha ai për bombardimet ruse të Ukrainës.
Ai dënoi gjithashtu rrëmbimin e fëmijëve ukrainas në territoret e pushtuara.
“Ajo që po ndodh tani kundër Ukrainës, nesër mund të drejtohet në vende të tjera dhe ne tashmë e shohim qartë drejtimin e agresionit – vendet baltike, Polonia, Ballkani”, tha Zelensky.
“Regjimi rus nuk sheh kufij, madje edhe Evropa nuk mjafton më”, tha Zelensky, duke treguar për veprimet ushtarake ruse në Siri dhe praninë në rritje të Moskës në rajonin Sahel të Afrikës.
Zelensky paralajmëron se presidenti rus Vladimir Putin po përpiqet gjithashtu të “dobësojë” vendet duke shkaktuar pasiguri ushqimore dhe energjitike.
Ai tha se bota ishte shumë “e frikësuar” për t’iu përgjigjur Putinit me forcë.
Duke falenderuar Francën në disa raste për mbështetjen e saj ushtarake dhe diplomatike, pasi Presidenti Emmanuel Macron njoftoi dërgimin e avionëve luftarakë në Kiev të enjten mbrëma, Zelensky tha se fitorja ishte e mundur, pavarësisht përparimit rus në front.
“A mund ta fitojmë këtë betejë, sigurisht, po”, siguroi presidenti ukrainas i cili foli për herë të parë para Parlamentit francez. /tesheshi.com/
