Në një video-mesazh, Zelensky iu drejtua NATO-s, duke u bërë thirrje vendeve perëndimore të dërgojnë armë të rënda për të mbrojtur Ukrainën kundër Rusisë.
“Çmimi i kësaj sigurie është shumë i qartë: avionë, tanke dhe sisteme të mbrojtjes ajrore për Ukrainën. Janë armë që i kanë partnerët tanë…”, ka theksuar Zelenski.
Ai shtoi se ata duan vetëm një për qind të avionëve dhe tankeve të NATO-s.
“Ne nuk duam më shumë dhe këtë e presim për 31 ditë. Mirë, kush e udhëheq komunitetin euroatlantik? A mos ndoshta Moska përmes frikësimit? Partnerët duhet të rrisin ndihmën për Ukrainën”, tha Zelensky, i cili paralajmëroi se siguria e Evropës ishte në rrezik.
Ai iu referua edhe takimit të delegacionit ukrainas me zyrtarë nga Shtetet e Bashkuara të Amerikës të mbajtur në Poloni.
Ai shtoi se ata diskutuan se çfarë i nevojitet Ukrainës dhe vuri në dukje se ushtria ukrainase nuk mund t’i gjuajë me pushkë raketat ruse.
“Pa një numër të madh tankesh dhe mjetesh të tjera të blinduara dhe aeroplanë, është e pamundur të kthehet Mariupoli”, tha Zelensky.
Ai u tha ushtarëve rusë se asgjë që ata bëjnë në qytetet e pushtuara përkohësisht nuk do t’u sjellë dobi. /tesheshi.com/
