Presidenti i Ukrainës, Volodymyr Zelensky, deklaroi së fundi se çlirimi i gadishullit të Krimesë, i cili u aneksua nga Rusia në vitin 2014, nuk është askund.
“Bota duhet ta dijë: Respekti dhe rendi do të kthehen në marrëdhëniet ndërkombëtare vetëm kur flamuri ukrainas të kthehet në Krime – kur të jetë i lirë”, tha Zelensky në një video-mesazh të publikuar nga zyra e presidencës ukrainase.
Më herët, në një video të takimit me personelin ushtarak musliman, duke përfshirë përfaqësues të tatarëve të Krimesë, Zelensky tha: “Çlirimi i Krimesë është i pashmangshëm, jo vetëm për Ukrainën, por për të gjithë botën. Unë jam i bindur për këtë”.
Tatarët e Krimesë janë muslimanë autoktonë të gadishullit, shumë prej të cilëve u larguan nga rajoni nga frika e persekutimit politik nga rusët.
Me këtë qëndrim, Zelensky hodhi poshtë një propozim të presidentit brazilian Luiz Inacio Lula da Silva, i cili argumentoi se Kievi mund t’i dorëzonte Rusisë gadishullin e Krimesë si pjesë e një marrëveshje paqeje me Moskën për t’i dhënë fund luftës.
Pak ditë më parë një nga bashkëpunëtorët e presidentit të Ukrainës e kishte lënë të hapur këtë mundësi. Andriy Sibiha, zv/shefi i shtabit të presidentit ukrainas, i tha Financial Times se Kievi do të ishte “i hapur” për diskutime mbi Krimenë nëse kundërsulmi i planifikuar nga ushtria ukrainase arrin sukses në qëllimet e saj.
“Nëse arrijmë qëllimet tona strategjike në fushën e betejës dhe arrijmë kufijtë administrativë të Krimesë, ne jemi të gatshëm të hapim një ‘kllapa diplomatike’ për të diskutuar këtë çështje,” u përgjigj Sibiha në një pyetje lidhur me të ardhmen e gadishullit. /tesheshi.com/
