Presidenti ukrainas Volodymyr Zelensky bëri thirrje të shtunën për bisedime domethënëse për paqen dhe sigurinë me Moskën, duke thënë se ishte shansi i vetëm i Rusisë për të kufizuar dëmet nga gabimet e saj pas pushtimit, përndryshe do të duheshin breza për t’u rikuperuar nga humbjet e pësuara gjatë luftës.
“Dua që të gjithë të më dëgjojnë tani, veçanërisht në Moskë. Është koha për një takim, është koha për një bisedë,” tha ai në një video të publikuar në orët e para të mëngjesit të së shtunës.
Ukraina ka ofruar gjithmonë zgjidhje për paqen dhe ka kërkuar negociata kuptimplota dhe të drejta për paqen dhe sigurinë, pa vonesë, tha Zelensky, duke shtuar se “ka ardhur koha për të rivendosur integritetin territorial dhe drejtësinë e Ukrainës. Përndryshe, humbjet e Rusisë do të jenë aq të mëdha sa duhet disa breza të rikuperohen”.
Të dy palët janë përfshirë në negociata për javë të tëra, por pa asnjë shenjë përparimi.
Zelensky tha se trupat ruse po bllokonin qëllimisht furnizimin humanitar për qytetet e sulmuara, duke komentuar se ishte “një taktikë e qëllimshme… Ky është një krim lufte dhe qind për qind do të mbahet përgjegjës”.
Ai tha gjithashtu se nuk kishte informacione se sa njerëz vdiqën pasi teatri në qytetin e Mariupol u godit të mërkurën, ku qindra njerëz u strehuan, duke shtuar se më shumë se 130 njerëz janë shpëtuar deri më tani.
Rreth 400,000 njerëz janë bllokuar në qytetin port strategjik të Detit Azov për më shumë se dy javë dhe granatimet e rënda kanë ndërprerë furnizimin me energji elektrike, ngrohje dhe ujë.
Ministria ruse e mbrojtjes tha të premten se forcat e saj po “shtrëngonin lakun” rreth Mariupolit dhe se luftimet kishin arritur në qendër të qytetit.
Zyrtarët në Mariupol thonë se 2,500 njerëz kanë vdekur që kur trupat ruse kaluan kufirin ukrainas më 24 shkurt. /tesheshi.com/
