Në një mosmarrëveshje të rrallë publike nga udhëheqësit ukrainas, presidenti Volodymyr Zelensky kritikoi të premten kryebashkiakun e Kievit për mosbërjen e mirë të punës në organizimin e strehimoreve për të ndihmuar qytetarët e mbetur pa energji elektrike dhe ujë për shkak të sulmeve ruse.
Si rezultat i sulmeve me raketa ruse në infrastrukturën energjetike, autoritetet hapën mijëra të ashtuquajturat qendra të pathyeshme ku njerëzit mund të ngrohen, të marrin ujë, internet dhe telefon.
Në fjalimin e tij të mbrëmjes, Zelensky pretendoi se kryetari Vitaliy Klitschko dhe bashkëpunëtorët e tij nuk kishin bërë mjaftueshëm.
“Për fat të keq, autoritetet lokale nuk bënë një punë të mirë në të gjitha qytetet. Ka pasur veçanërisht shumë ankesa në Kiev… Për ta thënë më butë, duhet bërë më shumë punë,” tha presidenti.
“Ju lutemi kushtoni vëmendje, njerëzit në Kiev kanë nevojë për më shumë ndihmë, shumë janë pa energji elektrike në orën 20:30. Ne presim punë cilësore nga kryetari i bashkisë,” shtoi ai.
Zelensky gjithashtu kritikoi ata që, tha ai, gënjejnë në raportet zyrtare, por nuk specifikoi se çfarë donte të thoshte konkretisht. Deri më tani janë hapur më shumë se 4000 qendra.
Këto janë deklarata të pazakonta, pasi që nga fillimi i luftës Zelensky është përpjekur të japë një përshtypje të unitetit kombëtar dhe zakonisht ka lavdëruar zyrtarë të tjerë.
Klitschko, një ish-boksier 51-vjeçar, u zgjodh kryebashkiak i Kievit në vitin 2014. Zyra e tij ende nuk është përgjigjur. /tesheshi.com/
