Ukraina do të synojë ushtarët rusë që qëllojnë në termocentralin e okupuar të Zaporozhyes, në jug të Ukrainës, tha presidenti Volodymyr Zelensky.
Ukraina dhe Rusia kanë shkëmbyer akuza për disa incidente të fundit dhe bombardime të objekteve në kompleksin e termocentralit bërthamor Zaporozhye, termocentrali më i madh bërthamor në Evropë që u shënjestrua nga trupat ruse në fillim të luftës.
“Çdo ushtar rus që ose qëllon në një objekt, ose qëllon duke përdorur një objekt si pozicion zjarri, duhet të kuptojë se ai bëhet një objektiv i veçantë për agjentët tanë të inteligjencës, për shërbimet tona speciale, për ushtrinë tonë,” tha Zelensky gjatë një fjalimi në të shtunën mbrëma.
Organizata G7 i bëri thirrje Moskës të tërheqë forcat e saj të armatosura nga termocentrali bërthamor, ndërkohë që agjencia e inteligjencës ushtarake ukrainase paralajmëroi më parë për “provokimet” e reja ruse rreth termocentralit, ndërsa kryetari i bashkisë në mërgim të qytetit ku ndodhet termocentrali bërthamor tha se uzina është “përsëri një objektiv i granatimeve ruse”.
Këshilltari i presidentit ukrainas, Mykhailo Podolyak, akuzoi Rusinë se “goditi një pjesë të termocentralit bërthamor që prodhon energji elektrike që furnizon jugun e Ukrainës”.
“Qëllimi është mbyllja dhe çaktivizimi i termocentralit bërthamor dhe fajësimi i ushtrisë ukrainase”, shkroi Podoljak në Twitter. /tesheshi.com/
