Presidenti ukrainas Volodymyr Zelensky tha të premten se “lufta do të përfundojë më shpejt” nën administratën amerikane të udhëhequr nga presidenti Donald Trump, duke vlerësuar kontaktet e tij të fundit me republikanin, pavarësisht frikës për një rënie të mbështetjes së Uashingtonit për Ukrainën.
“Është e sigurt se lufta do të përfundojë më shpejt me politikat e ekipit që tani do të udhëheqë Shtëpinë e Bardhë. Kjo është qasja e tyre, premtimi i tyre ndaj shoqërisë së tyre,” tha Zelensky në një intervistë për median ukrainase Suspilna.
Zelensky theksoi se ai kishte një “ndërveprim konstruktiv” me Donald Trump gjatë bisedës së tyre telefonike pas fitores së Trump në zgjedhjet presidenciale në SHBA.
Donald Trump “dëgjoi themelet mbi të cilat qëndrojmë. Unë nuk kam dëgjuar asgjë që bie në kundërshtim me qëndrimin tonë,” shtoi ai.
Trump ka qenë shumë kritik ndaj dhjetëra miliarda dollarëve për Ukrainën që nga fillimi i pushtimit rus në shkurt 2022, duke premtuar se do ta zgjidhte këtë konflikt “brenda 24 orëve”, por kurrë nuk shpjegoi se si.
Të premten, ai përsëri premtoi të “punojë shumë për Rusinë dhe Ukrainën” sepse “kjo duhet të ndalet”.
Ukraina i frikësohet një dobësimi të mbështetjes amerikane, në një kohë kur trupat e saj po përballen me probleme në front. Ajo ka frikë se një marrëveshje që përfshin lëshime territoriale ndaj Rusisë mund t’i imponohet asaj. /tesheshi.com/
