Nënkryetari i Lëvizjes BESA, Zekirija Ibrahimi i ftuar në emisionin “Rubikon” të KTV-së së bashku me deputetin e BDI-së, Artan Grubi ka akuzuar partinë e këtij të fundit si një ndër shkaktaret kryesore që sot Maqedonia qëndron më afër Moskës sesa BE-së.
Ibrahimi tha se është meritë e Lëvizjes BESA që BDI nuk i’u është bashkangjitur koalicionit me VMRO-në, sepse ndryshe, siç tha ai, Artan Grubi do ishte sot ministër i Nikolla Gruevskit.
“Duhet ta kenë të qartë të gjithë se për dy mandate resorin për Euro – Integrime e ka udhëhequr Bashkimin Demokratik për Integrim, ndërsa dje z. Johanes Hahn u prit me protesta në Shkup; dhe ky është “sukses” i BDI-së. Bashkëfajtore që Maqedonia sot është më larg BE-së dhe më afër Moskës, është pikërisht kjo qeveri. Kështu që sa më shumë që bie numri i votave të BDI-së, aq më të fortë bëhen shqiptarët e Maqedonisë. Kujtojeni që BDI i mori 19 deputetët dhe shkoi menjëherë me Nikolla Gruevskin, kurse prej se doli BESA në skenë, këta morën guximi t’i thonë jo Gruevskit. Po të mos ishte BESA sot me siguri Artan Grubi do të ishte ministër i Nikolla Gruevskit. Vota që i jepen BDI-së, është votë e djegur”, tha Zekirija Ibrahimi në “Rubikon”. /tesheshi.com/
