Në mëngjesin e sotëm u zbulua misteri i gurthemelit që qëndroi me javë të tëra pranë komunës së Çairit. Bëhet fjalë për shqiponjën dy krerëshe që u vendos në rrethrrotullimin në Çair. Mirëpo kjo shqiponjë nuk u mirëprit aq pozitivisht si nga opinioni i gjërë ashtu edhe nga anëtari i Kryesisë së Lëvizjes BESA, Zeqirija Ibrahimi. Sipas këtij të fundit të votosh të shpenzohen 600 milionë euro me përmendore si Car Dushani e Pallati i Oficerëve Serbë dhe këtë të mundohesh ta mbulosh me vendosjen ilegale të një shqiponje në Çair, është kulmi i manipulimit enverist.
“Të votosh për luanin e VMRO-së dhe këtë të mundohesh ta mbulosh me vendosjen ilegale të një shqiponje në Çair, ky është kulmi i qyqarisë. T’i vjedhësh paratë e popullit, të bëhesh milioner dhe të akuzohesh se ke marrë ryshfet 5 milionë euro në aferën “Maxhar Telekom” dhe këtë të mundohesh ta mbulosh me vendosjen ilegale të një shqiponje në Çair, ky është kulmi i poshtërsisë. Ta ndihmosh ose, së paku, ta lejosh të kalben në burgje të përjetshme shqiptarët dhe këtë të mundohesh ta mbulosh me vendosjen ilegale të një shqiponje në Çair, ky është kulmi i dështimit”, ka shkruar Ibrahimi në profilin e tij në Facebook.
Të akuzohesh se ke qenë pjesëmarrës në skenarin e Kumanovës, ku u vranë dhjetëra shqiptarë dhe u shkatërruan shumë prona shqiptare dhe këtë të mundohesh ta mbulosh me vendosjen ilegale të një shqiponje në Çair, ky është kulmi i dyftyrësisë, ka theksuar më tej Ibrahimi.
“Ta vrasësh Shqiponjën në Kumanovë dhe këtë të mundohesh ta mbulosh me vendosjen ilegale të një shqiponje në Çair, ky është kulmi i tradhtisë. Nuk ju shpëton asgjë më! As Isa Boletini në fshatin Saraj, as shqiponja ilegale në Çair, bile edhe vetë Enver Hoxha nëse ngrihet nga varri, ju tashmë jeni regjistruar në historinë e turpit të shqiptarëve të Maqedonisë”, ka shkruar Ibrahimi. /tesheshi.com/
