I ftuar në studiot e televizionit CNN Türk, Ibrahim Kallën u është kundërvënë kritikave nga jashtë në lidhje me vendosjen e gjendjes së jashtëzakonshme në Turqi.
“Ne do ta zbatojmë këtë [gjendjen e jashtëzakonshme] brenda kornizës së rendit ligjor. Asgjë nuk ka për ta prekur jetën e përditshme të njerëzve. Shteti do të bëjë gjithçka për t’u dhënë dërrmën komplotuesve,” i është përgjigjur zëdhënësi i presidentit turk interesimit të gazetares në studio.
“Paligjshmëria as që mund të diskutohet,” ka shtuar ai, duke kujtuar se qeveria e vendit të tij i përmbahet ligjit, në respekt të lirive.
Kallën ka sjellë si shembull vendosjen e gjendjes së jashtëzakonshme në Francë pas ngjarjeve të nëntorit të 2015-tës.
“Askush nuk tha që të drejtat njerëzore po humbasin në Francë, apo se tregjet po shemben. Prandaj askush nuk mund t’i thotë Turqisë diçka që nuk i është thënë Francës.”
Parlamenti turk miratoi dje formalisht me shumicë votash vendosjen e gjendjes së jashtëzakonshme në vend për tre muajt e ardhshëm. Një vendim përmes të cilit synohet kthimi i plotë i normalitetit në vend pas tronditjes së fundjavës së shkuar, kur një grup ushtarakësh e më gjerë u përpoqën të eliminojnë kryetarin e shtetit e ta marrin pushtetin me dhunë. /tesheshi.com/
