Ibrahim Kallën, zëdhënësi i presidentit të Turqisë, ka dalë dje para gazetarëve, ku ka deklaruar në lidhje me sulmet ajrore ruse mbi Siri se vetëm 9 deri në 10 për qind e tyre kanë shënjestruar ISIS-in, ndërsa tërë pjesa tjetër kanë qenë goditje ndaj forcave opozitare të moderuara.
Turqia e ka ngritur dhe më herët zërin për bombardimin e turkmenëve dhe opozitarëve të moderuar prej avionëve rusë, duke e bërë të njohur shqetësimin për objektivin e gabuar të forcave ruse, që pretendojnë të godasin vetëm ISIS-n.
“Turqia nuk ka problem me Rusinë që godet objektivat e ISIS-it në Siri, teksa ajo po ashtu lufton kundër kësaj organizate terroriste. Por Turqia është kundër Rusisë që vë në shënjestër civilët, e jo ISIS-in,” është shprehur zëdhënësi i Rexhep Tajjip Erdoganit.
Ashtu si presidenti e kryeministri turk, edhe Kallën ka reflektuar të njëjtin qëndrim ndaj incidentit në Bosfor me anijen luftarake ruse, ku shquhej një ushtar tek mbante në pozicion gjuajtjeje një lëshues raketash. “Sjellje fëmijërore” e ka quajtur dhe ai incidentin.
Në lidhje me çështjen e tregtisë së naftës me ISIS-n, Ibrahim Kallën ka sqaruar, “Ne kemi prova që tregojnë se cilat vende po blejnë naftë nga ISIS-i.”
Duke iu referuar krizës së refugjatëve, ai do të shtonte, “Nuk është e mundur të zgjidhet kriza e refugjatëve pa gjetur një zgjidhje për konfliktin sirian.” /tesheshi.com/
