Në një shkrim të tijin në Politico.com, Ibrahim Kallën, zëdhënësi i Erdoganit, ka vënë në pah tërë pakënaqësinë që mbizotëron në Turqi mbi sjelljen e vendeve europiane pas puçit të dështuar ushtarak të një muaji më parë.
Nën titullin, “Bruksel, ke një problem”, Kallën e nis duke thënë se puçi i dështuar në Turqi përbën një pikë kthese jo vetëm për shoqërinë turke, por po ashtu për marrëdhëniet midis vendit të tij dhe Brukselit.
“Bashkimi Europian e portretizon veten si mbrojtës të demokracisë, të të drejtave të njeriut dhe shtetit ligjor, por përgjigjja e dobët ndaj sulmit më serioz ndaj demokracisë në një vend kandidat ishte zhgënjyese,” thotë zëdhënësi i kryetarit të shtetit turk.
“Shumica dërrmuese e shoqërisë turke, fetare apo shekullare, konservatore apo liberale, mendon se pas puçit ishin gylenistët, e se Gyleni, i cili jeton në Pensilvani, duhet ekstraduar në Turqi për t’u përballur me drejtësinë,” vijon analiza e Ibrahim Kallënit.
Ai është i mendimit se çka pasoi pas puçit kishte rrjedhoja të mëdha politike. “Qytetarët e zakonshëm i lanë mënjanë atë natë dallimet politike, për t’u bashkuar kundër puçistëve… Presidenti Erdogan u takua në ditët e mëvonshme me udhëheqësit kryesorë të opozitës… Ata i dërguan një mesazh të qartë botës: Turqia është e bashkuar dhe më e fortë se kurrë!”
“Fatkeqësisht, ngjan që Brukseli të mos e ketë vënë re frymën e gjetur rishtas të solidaritetit. Disa nga deklaratat e para të udhëheqësve të BE-së ishin dykuptimëshe, duke çuar në zemërim, e madje në teori konspiracioni.”
Ja ç’thotë Ibrahim Kallën: “Në vend të dënimit pa lëkundje të puçit dhe të mbështetjes së përpjekjeve të qeverisë së zgjedhur për t’i dërguar puçistët para drejtësisë, Europa zgjodhi të sulmojë udhëheqësit turq për bërjen përgjegjës të juntës në tentativë për krimet e saj.”
“Shumë turq, duke përfshirë mbështetësit e anëtarësisë në BE, janë thellësisht të zhgënjyer me Brukselin…”
Ai thekson faktin e dëshpërueshëm se, “Asnjë kryetar i vetëm shteti europian nuk e ka vizituar Turqinë që prej puçit të dështuar për të shprehur solidaritetin.”
Kallën kujton se mungesa e veprimit europian kërkohet të mbulohet nga disa vëzhgues me vizitën e Erdoganit në Rusi, duke e paraqitur atë si një mesazh për Europën.
“Edhe sikur ky pretendim të ishte i vërtetë,” pyet Kallën, “çfarë i pengon kryetarët e shteteve europiane ta vizitojnë vendin për të shprehur solidaritetin me popullin turk, me parlamentin, me presidentin dhe me qeverinë e tij?”
“Reputacioni i BE-së si avokate e demokracisë, e të drejtave të njeriut dhe e rendit ligjor është në rrezik,” nënvizon Kallën.
Zëdhënësi i Erdoganit, duke iu afruar fundit të analizës, sjell në vëmendje se me qëndrimin shpërfillës, “Brukseli jo vetëm ftoh një aleat të madh, por gjithashtu tradhton vlerat dhe parimet e veta”. /tesheshi.com/
