Në një dalje para gazetarëve, John Kirby, zëdhënësi i Departamentit të Shtetit, i ka hedhur poshtë zërat për një përfshirje të amerikanëve në një përpjekje të para dy javëve për marrjen e pushtetit me dhunë në Turqi.
“Qartësisht ne nuk kishim përfshirje në këtë,” u ka thënë ai gazetarëve, duke iu referuar puçit të përgjakshëm ushtarak.
Turqia, do të nënvizonte ai, nuk është vetëm një aleat, por një vend mik e partner.
Për SHBA-të, me fjalët e Kirby-t, është e rëndësishme demokracia në Turqi, duke i njohur të drejtën këtë vendi të hetojë e t’i vërë para përgjegjësisë ata të cilët e organizuan puçin ushtarak.
“Ne e kemi bërë të qartë se qeveria turke ka të drejtë dhe përgjegjësi ndaj qytetarëve të vet që t’i shkojë gjer në fund kësaj,” u ka bërë me dije John Kirby gazetarëve.
I pyetur për ekstradimin e Fethullah Gylenit e për dëmtimin e mundshëm të marrëdhënieve turko-amerikane nëse kjo gjë nuk ndodh, Kirby ka thënë se kërkesa e ekstradimit po shqyrtohet e se nuk do të ketë njoftim të mëtejshëm gjer në mbarim të procesit.
Në Turqi ka një pakënaqësi të shtuar në lidhje me zvarritjen nga ana e SHBA-ve të kërkesës për ekstradimin e Gylenit.
Madje ministri turk i Drejtësisë, Bekir Bozdag, tha dje në një intervistë televizive se kishte informacione që Gyleni po bëhej gati t’i linte SHBA-të, drejt një tjetër destinacioni strehues. /tesheshi.com/
