Opozita braktis bojkotin e komisioneve dhe shkon në takimin me Vllahutin.
Deputetët e PD-së dhe LSI-së, edhe pse kanë sulmuar ashpër për një periudhë të gjatë ambasadorën e BE-së, sot kanë marrë pjesë në prezantimin e progres-raportit të KE në komisionin parlamentar të Integrimit nga ambasadorja Romana Vlahutin.
Mbledhjen e ka drejtuar vetë kryetari i komisionit parlamentar të Integrimit, Genc Pollo. Deputetët e tjerë të PD që kanë thyer bojkotin janë Jorida Tabaku, Enkelejd Alibeaj dhe Grida Duma.
Ndërsa nga LSI marrin pjesë ish-ministrja e Integrimit, Klajda Gjosha si dhe deputetët Petrit Vasili e Edmond Panariti.
Kreu i komisionit parlamentar të Integrimit, Genc Pollo tha se opozita po lobon për të bindur vendet skeptike për çeljen e negociatave në qershor.
Pollo i uron Ramës sukses në Gjermani dhe kërkoi të ndalojnë sulmet ndaj deputetëve europianë.
“Opozita po bën përpjekje për të bindur vendet skeptike. Shpresoj që Rama të ketë sukses sot në Gjermani. Të shmangen sulmet ndaj deputetëve evropianë. Jo sulme për merita e fajtorë”, tha Pollo.
Ambasadorja e BE në Tiranë, Romana Vlahutin tha se qeveria duhet të rrisë përpjekjet për të thelluar reformat.
“Reformat të ruhen e të thellohen. Të shohim çdo të mendojnë shtetet anëtare në qershor për negociatat. Duhet konsensus konkret në veprime dhe jo vetëm në retorikë. Vullneti politik është thelbësor. Informacionet vijnë nga dhjetëra burime të ndryshme, në fund, raporti duhet të miratohet nga gjithë kolegji, duhet të marrë një vendim njëzëri dhe kjo është ajo që ndodhi me Shqipërinë kur u hap drita e gjelbër”, tha Vlahutin.
Ambasadorja e BE u ndal edhe te marrëveshja e 17-majit, Rama-Basha, e cila përmendet që në hyrje të progres-raportit si moment kyç që shtensionoi konfliktin politik, lufta kundër narkotikëve si dhe bisedimet me Greqinë.
Ish-ministrja e Integrimit Europian, Klajda Gjosha deklaroi se mazhoranca dhe opozita duhet të ulin retorikën konfliktuale.
Mesazhi i saj ishte edhe për qeverinë e cila sipas saj nuk duhet të ekzaltohet nga vendimi i KE për çeljen e negociatave, por të fokusohet te detyrat që e presin.
“Të ulen retorikat e forta që kemi dëgjuar këto ditë. Por, ekzaltimi për rekomandimin pozitiv duhet të mbarojë dhe institucionet duhet të nisin nga analiza e raportit sepse është shumë i gjatë. Flasin qartë objektivat që duhen arritur, për reformat ekonomike. Përsa i takon administratës publike, unë bëj pjesë te ata persona që mendojnë se integrimi nuk mund të kryhet pa burime njerëzore. Pastrimi i administratës publike ka shkaktuar një bllokim të saj”, tha Gjosha. /tesheshi.com/
