I ashtuquajturi mision humanitar i Rusisë në Nish të Serbisë është cilësuar pa hezitim nga Bashkimi Europian, si një qendër komanduese e shërbimit sekret rus për të destabilizuar Ballkanin.
Kanë qenë media të ndryshme ruse që e kanë bërë publike këtë fakt, por që u pohua dhe zyrtarisht nga ministri i Jashtëm serb, Ivica Daçiç, i cili ndodhej për një vizitë në Rusi.
Serbia është në mesin e fushatës ekeltorale dhe thuajse të gjithë politikanët e mazhorancës qeverisëse po vizitojnë Moskën njëri-pas tjetrit me shpresën se do të marrin mbështetje nga elektorati nacionalist serb.
Shefi i diplomacisë ruse, Sergej Lavrov, tha se përfaqësuesi i Bashkimit Europian në Serbi ka refuzuar të vizitojë qendrën humanitare ruse në Nish, edhe pse është ftuar për një gjë të tillë.
Ndërkaq, Daçiç tha se “qendra humanitare ruso-serbe s’ka lidhje me spiunë pasi nuk kemi ç’të spiunojmë; serbët i duan rusët dhe nuk duam të spunojmë njëri-tjetrin”.
Mirëpo zhurma e madhe për ta përgënjështruar erdhi pas disa fotove ku tregohen se në qendër jo vetëm bëhen plane por nisen edhe detashmente me trupa operacionale që marrin pjesë në operacione të ndryshme.
Dhe realisht, sapo është instaluar kjo qendër, operacionet destabilizuese në rajon janë rritur dhe ndodhin në mënyrë periodike. Edhe për “Lagjen e Trimave” në Kumanovë u fol për ndërhyrjen e qarqeve të tilla.
Ministri i jashtëm rus, Lavrov ngriti zërin duke sulmuar krerët e Bashkimit Europian.
“Mua nuk më pëlqen që partnerët tanë në BE të vazhdojnë të tregojnë përralla të tmerrrshme për Nishin, sipas të cilëve është i tejmbushur me spiunë rusë, pasi kjo i komplikon më tepër marrëdhëniet tona”, tha kreu i diplomacisë së Moskës.
Ai shtoi se ekspertët e qendrës humanitare do të zhvillojnë së shpejti operacione ndihme në Palmira-Rusi.
Ndërkaq, gazeta e njohur ruse Komersant, botoi dje një koment ku theksonte se dhënia e pafajësisë për kreun e paramilitarëve serbë, Vojisllav Sheshel do të ndikojë fuqishëm në rritjen e trendit nacionalist në Serbi, duke parashikuar dhe një rritje të grupimeve ekstremiste.
Përgatiti: Ylli Pata – /tesheshi.com/
