LSI nuk ka publikuar ende rezultatet e votimit për kryetar duke thënë se ka shumë fletëvotime dhe procesi do të kryhet me avash dhe korrektësi.
Megjithatë nuk ka dyshime që Ilir Meta do të rizgjidhet, por dy rivalët e tij Shezai Rrokaj dhe Përparim Spahiu priten të emërohen nënkryetarë të partisë.
Ndërkaq, mësohet se njëri nga nënkryetarët do të paraqesë në Konventën e LSI-së një dokument që do të kërkojë kushtëzimin e aleancës së ardhshme me PS-në për vitin 2017.
Pritet që kjo të bëhet me anë të një rezolute që i jep mandatin kryetarit për negociata.
LSI do t’i kërkojë PS-së që të përtërisë të njëtën marrëveshje të vitit 2013, pra që të ketë një format PS-LSI për ndarjen e pushtetit pa përfshirë PDIU-në e Shpëtim Idrizit dhe FRD-në e Bamir Topit.
Sipas këtij formati, dy partitë e mëdha do të duhet të ndajnë deputetët dhe zonat elektorale të influencës dhe më pas pushtetin ekzekutiv ku LSI do të kërkojë ose kryeministrin ose 3 ministritë kyçe të kabinetit.
Meta pritet që të nisë një lobim edhe brenda Partisë Socialiste Europiane në mënyrë që të ndikojnë që të përtërihet “Pakti i Shkodrës” që u firmos me bujë me pjesëmarrjen e krerëve të partive të majta të Ballkanit.
Siç mësohet, eurodeputeti gjerman, Knut Flickenstein, është zgjedhur nga Meta si negociator i një marrëveshje të ardhshme politike.
Por kjo marrëveshje me këtë format cilësohet e papranueshme nga Shpëtim Idrizi, i cili kërkon një pakt në tavolinë ku të ndahet “torta” e gjitha në një tavolinë dhe jo të marrë mbetjet që teprojnë nga marrëveshja Rama-Meta.
Kreu i LSI-së, Ilir Meta, deklaroi që deri në dhjetor nuk do të merret asnjë vendim.
“Në datat 3 dhe 4 dhjetor kemi Konventën, që do të zgjedhë edhe forumet e reja të LSI-së. Më pas janë ato që do të përcaktojnë axhendën e LSI-së”, tha Meta.
Aktualisht, Ilir Meta e konsideron veten pa mandat negociimi.
“Unë nuk e di se kush mund të marrë një vendim në rast se nuk ka mandat”, theksoi Meta.
/tesheshi.com/
