Zbulohet plani real i PD-së për të dalë nga çadra me dy fitore në “xhep”

PD ka deklaruar se nuk do të marrë pjesë në zgjedhjet e 18 qershorit, por dy nga aleatët e saj kanë bërë regjistrimin në KQZ.

Ky lajm i përhapur gjatë mëngjesit të sotëm ka shkaktuar një përshtjellim të madh në mjedisin politik të çadrës dhe ende nuk ka pasur një qëndrim të Lulzim Bashës, i cili po pret një lëvizje për të parë se ç’po ndodh realisht.

Edi Rama ishte i pari që provokoi PD-në me një postim jo aq të qetë.

E vajtueshme sjellja e PD me partnerët ndërkombëtarë. E dëshpëruar kyçja në Çadrën e Kampingut për t’i ikur Fshesës së Vetingut. Të pashpresë!”, shkruan sot kryeminstri në Façebook.

Sipas mediave të PD-së ky është sinjal që Edi Rama ka humbur qetësinë nga qetësia e vetë çadrës.

Por në fakt askund nuk ka qetësi, as në çadër dhe as në mazhorancë.

Ilir Meta i ka dhënë një shenjë force Edi Ramës pasi nuk i dërgoi deputetët e tij në Komisionin e Ekonomisë për të shkarkuar gruan e Dashamir Shehit nga pozicioni i kryetares së Autoritetit Monitorues Financiar.

Por nga ana tjetër, deputetë të mazhorancës besojnë se ky është një sinjal “tymues” për të treguar se po negociohet me Dashamir Shehin për të thyer bojkotin.

Vetë Shehi ka deklaruar se nuk bën kompromis me kauzën e opozitës.

Kryetari i Partisë Balli Kombëtar, Adriatik Alimadhi dhe kreu Partisë Aleanca Demokratike, Eduart Abazi, u shprehën  se kanë çuar pranë KQZ dokumentacionin ligjor për t’u regjistruar në zgjedhje, duke konfirmuar kësisoj pjesëmarrjen në garën e 18 Qershorit.

Po ashtu, krerët e 10 partive të djathta, aleate të Partisë Demokratike, thanë se do të referojnë dokumentet në KQZ brenda afatit të parashikuar në Kodin Zgjedhor.

Ndërkaq edhe shtyrja e Vetingut për një javë duket se i ka shërbyer pikërish kësaj situatë në dukje e qetë, por që zien fort brenda saj.

Realisht po luhen lojra më të mëdha se kaq: lojra që kanë brenda jo vetëm Vetingun por edhe shtyrjen e zgjedhjeve. Një burim diplomatik i tha tesheshi.com se nga Partia Demokratike ka sinjale se përpjekja e saj mund të tejkalojë afatin zyrtar dhe të heqë dorë nga kërkesa për qeveri teknike, duke marrë si fitore dy koncensione: Zgjedhjen e një Presidenti konsensual dhe shtyrjen e zgjedhjeve në vjeshtë.

Pritet që kërkesa për shtyrjen e zgjedhjeve të arrtikulohet së shpejti nga deputetë të Partisë Demokratike, të cilët më pas do të kërkojnë si hap të parë për vullnet nga ana e mazhorancës, tërheqjen nga zgjedhja e një presidenti prej radhëve të saj.

PD do të bëjë gati më pas kërkesën zyrtare për zgjedhjen e një Presidenti mbi palët me anë të një procesi negociatash.

Vetëm atëherë Partia Demokratike do të përfshihet në procesin e Vetingut.

Dhe natyrisht Lulzim Basha mund të dalë nga çadra me dy fitore në tavolinë dhe me një mundësi më shumë për të fituar zgjedhjet e shtyra, pasi futet në to me dy fitore në xhep dhe me një mazhorancë të rrudhur nga imazhi i lëshimit të fortë ndaj opozitës.

Ky është të paktën një nga planet e opozitës që pritet t’i bëhet i ditur edhe zyrtarisht publikut, pasi qarqeve diplomatike i është bërë e ditur që javën tjetër.

Madje ka zëra që edhe biseda Basha-Mogherini ka pasur këtë objekt dhe së shpejti në Tiranë do të vijë jo Fleckenstein por Eduard Kukan që është aleat i PD-së dhe mund të nisë negociatat. /tesheshi.com/