Në mediat serbe është publikuar një polemikë e ministrit të jashtëm serb, Ivica Daçiç me homologun e Kosovës, Behgjet Pacolli.
E çuditshmja është se Daçiç nuk përmend argument politik por flet për madhësinë fizike. Në një koment të sajin, gazeta Politika thekson se kjo mënyrë mund të jetë një kod që “dikush duhet ta dëshifrojë”.
Daçiç ka deklaruar se Pacolli ka paguar një shumë të madhe parash për lobimin e njohjes së Kosovës, porse sipas tij nuk do të ketë sukses.
“I thashë që po të shkojnë paratë kot. Por ai më quajti të vogël. Doja t’i thoja që dakord, jam i vogël, po ti përse mërzitesh? Nëse jam i vogël, përse humbe në betejën në Interpol dhe Unesco? Përse Giunea Bisao dhe Surinami anuluan njohjen e shtetit të Kosovës. Unë e di se je shumë i mërzitur për këtë big Pacolli”, ishte deklarata e Daçiçit.
Aksioni më i fundit i Ivica Daçicit është që të ulë njohjet e Kosovës poshtë numrit 100, në mënyrë që më pas të nisin bisedimet përfundimtare Prishtinë-Beograd nga një pozicion i pavaforshëm për Kosovën.
Dhe pikërisht këtu është thelbi i mesazhit të koduar të Daçiçit ndaj Pacollit.
Zv.kryeministri i Serbisë ka ndërmarrë një aksion të fuqishëm diplomatik në Amerikën Latine, për të bindur vendet e këtij rajoni që të anulojnë njohjet e Kosovës.
Duke përdorur shembullin e Spanjës dhe ndikimin e saj në këto vende, Beogradi po bën luftë paralele me Madridin. Siç mësohet, qeveria spanjolle u ka kërkuar vendeve latino-amerikane që të mos e njohin pavarësinë e Katalonjës, dhe në këtë kanal ka hyrë edhe Serbia për të shfrytëzuar hapësirën.
Në betejën e tij, Daçiç natyrisht po përdor si armë edhe kanalet ruse, por po zhvillohet në mënyrë konsistente pa u ndalur.
Ndërsa Prishtina dhe Tirana e kanë lënë thuajse bosh këtë hapësirë, duke i krijuar një korridor ku Beogradi mund të lëvizë lirshëm.
E përditshmja serbe Politika, duke zbërthuer planin e Daçiçit deklaroi se menjëherë pasi të mbyllë punë me Amerikën Latine, ministri i Jashtëm i Serbisë do të zhvendoset në ishujt e Oqeanisë.
Kur Guinea Bissao dhe Surinami morën vendimin për të anuluar njohjen e Kosovës, në Prishtinë u cilësua si një akt i “thjeshtë”, por që tani duket se ishte vetëm maja e ajzbergut.
Ka shumë gjasa që në ditët e ardhshme të kemi zhvillime të reja.
Sipas Politika-s, kjo do të balancojë forcat në tryezën e bisedimeve që pritet të nisin në 2018-n ndërmjet Hashim Thaçit dhe Aleksandër Vuçiçit për të mbyllur përfundimisht problemin e Kosovës. /tesheshi.com/
