Zbulohet plani “B” i Shteteve të Bashkuara të Amerikës dhe i Bashkimit Europian për reformën në drejtësi.
E gjithë përpjekja për të arritur që ndryshimet kushtetuese të miratohen edhe nga deputetët e Partisë Demokratike nuk është çështje e miratimit në Parlament, pasi aktualisht janë të siguruara 94 votat, por për të mos e bërë Ilir Metën faktor vendimtar për zgjedhjen e prokurorit të përgjithshëm të ri pas miratimit të reformës.
Burime diplomatike i thanë faqes tesheshi.com se ambasadori i Shteteve të Bashkuara të Amerikës në Tiranë, Donald Lu, dhe ajo e Bashkimit Europian, Romana Vllahutin, do të jenë nesër të pranishëm në grupin parlamentar të Partisë Demokratike, pikërisht për ta paraqitur këtë qëndrim. Lu do t’i qaset opozitës shqiptare duke i dhënë rolin e “aksioneres” në sistemin e ri të drejtësisë, së bashku me Partinë Socialiste. Do të bëhet e ditur se votimi i reformës nga ana e Partisë Demokratike është e vetmja mundësi për atë që të bëhet faktor relevant politik, pasi, nëse e humbet rastin, atëherë mund të shkonim në një dualitet PS-LSI, duke e lënë mënjanë opozitën.
Deri tani mësohet se pjesa më e madhe e grupit parlamentar të Partisë Demokratike është dakort që ta votojë reformën për drejtësi, por gjithçka ka mbetur tek lideri historik, Sali Berisha, dhe te disa deputetë besnikë të tij, që nga Jozefina Topalli e deri tek Gent Strazimiri.
Aktualisht, sipas llogarive të bëra, është formuar një “bërthamë e gatshme” që do ta votojë reformën: 64 deputetët e PS-së, 20 deputetët e LSI-së, 5 deputetët e PDIU-së, një deputet i PBDNJ-së, disa deputetë të distancuar nga PD-ja, si Nard Ndoka, Dash Shehi, Agron Duka, por edhe disa deputetë të mënjanuar në grupin parlamentar të Partisë Demokratike.
Por kjo situatë i ka dhënë Ilir Metës një peshë specifike shumë të madhe, e cila mund ta bëjë atë vendimtar në planin “B”, që është zgjedhja e kryeprokurorit të ri dhe nisja e fushatës së arrestimeve nga Byroja Kombëtare e Hetimit.
Veçse prej kohësh po punohet për një aleancë ndryshe për drejtësinë, e cila në fakt është përmendur nga vetë Ilir Meta gjatë një interviste te programi “Zonë e Lirë”, i Arjan Çanit, në televizionin Klan.
Ky plan e asnjanëson pothuajse përfundimisht Lëvizjen Socialiste për Integrim, pasi, nëse kryeprokurori zgjidhet me një “shoqëri aksionere PS-PD”, ka shumë gjasa që deri në zgjedhjet e ardhshme të formohet një kabinet i ri qeveritar. Dhe nëse LSI-ja largohet nga qeverisja pa marrë një sinjal nga Partia Demokratike se do të bëjë aleancë në rast fitoreje, atëherë forca reale e Metës shkërmoqet, pasi nuk mund të marrë vota pa u siguruar njerëzve vende pune.
Dhe në këtë logjikë mund të shihet egërsia e manovrave të përkrahura nga Meta, qoftë me Bojaxhiun, qoftë dhe me përplasjet brenda mazhorancës.
Ditën e djeshme është zhvilluar takimi i parë pas tre javësh mes Edi Ramës dhe Ilir Metës, dhe, sipas burimeve, biseda ka qenë mjaft e acaruar, pikërisht për shkak të mundësisë së futjes së PD-së si faktor i fuqishëm në lojë. /tesheshi.com/
