Një drekë politike, ku pjesëtarë të saj ishin emra mjaft të rëndësishëm të politikës së 20 vjetëve nuk u komentua siç duhet.
Në mesin e tollovisë për Prokurorin e përkohshëm, Agron Duka, kreu i Partisë Agrare mblodhi së bashku Bamir Topin, Ben Blushin, Vangjel Dulen dhe Dash Shehin për të vënë një bast politik të rëndë: të themelojnë polin e tretë politik në vend, pikërisht tani që LSI e ka themeluesin në Presidencë dhe i ka ikur edhe “tepsia e pushtetit”.
Por edhe pse nuk u komentua kjo lëvizje e fuqishme, vetë Agron Duka nuk mund të rrijë. Ai shpall se së shpejti do të largohet nga opozita e Lulzim Bashës dhe jo vetëm, por edhe me kreun e PDK-së dhe atë të PBDNJ-së, një katolik e një ortodoks, Ndokën dhe Dulen.
I bindur se në selinë blu nuk kanë shumë hapësirë, ose do t’i shtypin siç i ndodhi me republikanët e Mediut, Agron Duka shpjegon se 10 “kalorësit” e politikës do të komandojnë vetë 10 armata politike në të gjithë vendin për të arritur një grup deputetësh sa ç’janë edhe kryetarë.
Agron Duka ia ka edhe idenë se çfarë qëllimi do të arrijnë: të mos lënë që në zgjedhjet e ardhshme të vijë në pushtet një mazhorancë e vetme.
“Në mbyllje të këtij viti, i cili ka qenë mjaft i ngarkuar për politikën shqiptare; dhe si pasojë e dinamikave që morën ngjarjet, dhe efektet që ato patën mbi partitë alternative, vendosëm të hedhim disa hapa të cilat do të konkretizohen duke nisur nga janari i ardhshëm. Mund të them se rezultati i parë do të jetë krijimi i një boshti prej 10 partish, parlamentare dhe jo, dhe bashkërisht do të prezantojmë një platformë me propozime konkrete; sigurisht, guri i themelit i këtij bashkimi është “Reforma Zgjedhore”. Lançimi i kësaj ideje politike, e kësaj alternative, do t’i bëjë mirë shoqërisë shqiptare dhe vetë jetës politike në vend, pasi kërkon që procesi zgjedhor të lejojë përfaqësimin e sa më shumë shtresave të popullsisë. Ideja e një poli të tretë apo të qendrës, në thelbin e saj ka edhe një efekt tjetër pozitiv, limiton mazhorancat e plota nga një forcë e vetme; eksperiencat kanë treguar që mazhoranca, sidomos aktualja, sillen me arrogancë dhe për të frenuar këtë sjellje është e rëndësishme të ketë një ekuilibër në çdo mazhorancë të ardhshme”, deklaron Agron Duka në një interviste për Nikollë Lesin, gazetën e së cilit e ka komshi me selinë e Partisë Agrare.
Duka thekson se fryma e kësaj force nuk do të jetë përplasja dhe konflikti, por mesazhi pozitiv dhe i qetë.
“Duke qenë partizan i një politike pozitive dhe konstruktive, besojë se do të krijohen kushtet për të patur një bashkëpunim më të gjerë, i cili do të pasqyrojë qëndrimet konsekuente që ne kemi kundrejt zgjedhësve tanë. Pra ne do të qëndrojmë fuqimisht të lidhur me çështjet e PAA-së, por gjithashtu do t’i shërbejmë stabilitetit të vendit. Duam të krijojmë një klimë konstruktive dhe pozitive, më bashkëpunuese dhe njëkohësisht t’i shërbejmë përshpejtimit të atyre reformave që ndihmojnë integrimin në BE, por edhe në përmirësimin e situatës ekonomike në vend”, deklaron më tej Duka, duke hyrë si një alternativë edhe e mazhorancës, por edhe e opozitës.
Të parën e konkuron me figurat politike që i ka edhe të majta si Blushi, edhe të djathta si Topi, Dash Shehi, Nard Ndoka, por edhe kreun e minoritetit grek si Vangjel Dule. A do t’ja arrijë? Kështu në “kallëp” duket mirë, por zgjedhjet janë një aventurë e rëndë.
Megjithatë përpjekja e 10 “kalorësve” mund të jetë një përpjekje për ta qetësuar politikën edhe pse nuk e rison atë. /tesheshi.com/
