Ka nisur të kalojë në sitë pasuria e Kelmend Balilit, i njohur ndryshe si “Eskobari i Ballkanit”. Pasuria e tij mendohet të jetë marramendase, por në Shqipëri pas hetimeve nga prokurorët e Task-Forcës, pranë Krimeve të Rënda kanë identifikuar dy biznese në emrin e 43-vjeçarit, i cili aktualisht është shpallur në kërkim me urdhër ndërkombëtar.
Në 18 janar 2010, ai ka regjistruar pranë Qendrës Kombëtare të Bizneseve një restorant në Ksamil, pranë rrugës nacionale “Sarandë-Butrint”, në një godinë 3 katëshe, afërsisht 18 kilometra pranë Parkut Kombëtar të Butrintit, ku ish-drejtori i Transporteve të Sarandës është pronari i vetëm i tij.
Biznesi i dytë është firma “Montana”, e cila ka në fokus kryesor të veprimtarisë së saj tregtinë me shumicë dhe pakicë të karburanteve, lëndëve djegëse dhe nënprodukteve të tyre.
Task-Forca po heton intensivisht për pasuritë dhe llogaritë bankare të Balilit, për t’ju drejtuar më pas gjykatës me kërkesën për sekuestro konservative deri në përfundim të hetimeve ndaj tij.
Për Balilin është dhënë urdhër arresti që prej datës 17 maj nga autoritetet greke, për trafik ndërkombëtar droge, ndërsa policia shqiptare nuk ka rënë ende në gjurmët e tij. Në aksionin e fundit blic mendohet se operacioni u dekonspirua, duke bërë që ai t’i shpëtojë arrestimit./tesheshi.com/
