Kabineti i kryetarit të Kuvendit të Maqedonisë ka kërkuar një shkrezë zyrtare nga ana e Prokurorisë Speciale ku të kërkohet zyrtarisht se ky institucion kërkon dhënien e autorizimit për paraburgimin e deputetit Nikolla Gruevski, ish-kryeministër i Maqedonisë dhe njëkohësisht lider i VRMO-DPMNE-së.
Siç bëjnë të ditur mediat maqedonase, Komisioni për Verifikimin e Mandateve ka marrë sot vetëm një shkresë, atë të Nikolla Gruevskit, i cili kërkon që Kuvendi të heqë imunitetin e tij.
Por kjo është vetëm një lojë politike, pasi nuk bëhet fjalë për heqjen e imunitetit por për dhënien e autorizimit për arrestim.
“Në lidhje me njoftimin nga ana e deputetit Nikolla Gruevski për heqjen dorë nga e drejta në imunitet, të dërguar pranë Komisionit për Çështjet e Rregullores dhe Mandatit dhe Imunitetit të Kuvendit të Republikës së Maqedonisë, më 30 qershor të vitit 2017, Ju njoftojmë se Komisioni nuk është kompetent për procedim në lidhje me këtë njoftim”, theksohet nga ana e Kuvendit, në lidhje me kërkesën e Gruevskit.
“Në përputhje me nenin 53 të Rregullores të Kuvendit të Republikës së Maqedonisë, Komisioni procedon sipas kërkesës për lejimin e paraburgimit, që organi kompetent (gjykata), e dërgon te Kryetari i Kuvendit të Republikës së Maqedonisë, me ç’rast Kërkesa dërgohet te Komisioni”, thuhet në deklaratwn e e Kuvendit të Maqedonisë.
Pikërisht kjo është çështja thelbësore, pasi gjykata ka pasur si argument të sajin në shqyrtim mungesën e një shkrese zyrtare nga Kuvendi.
Ndoshta kjo ka qenë kleçka që ka shpëtuar Nikolla Gruevskin nga arrestimi paraprak, bën të ditur portali 24vesti. /tesheshi.com/
