Zbulohet dokumenti që presidenca bullgare ka bërë gati për hyrjen e katër vendeve të Ballkanit Perëndimor në rrugën drejt Bashkimit Europian.
E përditshmja bullgare 24 Çasa, ka publikuar planin që Presidenca 6-mujore e këtij vendi e BE-së, ka dorëzuar në Bruksel për axhendën e zgjerimit.
Për herë të parë pas vitit 2003, një vend ballkanik i BE-së ka kryesinë e radhës së Bashkimit Europian dhe si atëherë ky rajon është në qendër të diskutimeve për një semestër.
Dhe në këtë aspekt, Samiti i Sofjes që mblidhet në maj është shumë i rëndësishëm, ku përveç krerëve të vendeve të BE-së do të jenë prezentë dhe kryeministrat e të gjithë shteteve të Ballkanit.
Dokumenti thekson se ndërsa Serbia dhe Mali i zi pritet të hapin edhe disa kapituj të rinj, pasi negociatat i kanë hapur dy vjet më parë, Shqipëria dhe Maqedonia kanë shanse “realiste” për të hapur negociatat me Bashkimin Europian.
Federica Mogherini u ka dërguar një memo krerëve të shteteve të 28 shteteve të Bashkimit Europian, ku i tregon se Shqipëria dhe Maqedonia do të duhet t’u hapen negociatat me BE-nw për arsye gjeopolitike, pasi përndryshe do t’i dorëzojmë Ballkanin, Rusisë.
Parisi zyrtar dhe vetë presidenti Emanuel Macron, ka marrë në “patronazh” Athinën që ta bindë për të mos vendosur veton për Shkupin.
Sipas të gjitha gjasave, përpara marsit çështja e emrit të Maqedonisë pritet të gjejë zgjidhje.
Ndërkaq, Radio Sofja bën të ditur se tema e Ballkanit është diskutuar edhe në takimin mes kryeministrit të Bullgarisë, Bojko Borisov dhe kreut të Komisionit Europian, Jean Claude Juncker.
Borisov e Juncker shqyrtuan në Sofje partneritetin mes qeverisë dhe KE-së gjatë kryesisë bullgare sipas parimit të rotacionit të Këshillit të BE-së.
Radio Sofja thekson se “bashkëfolësit shprehën pritjet e tyre për përmirësimin e dialogut me shtetet fqinje të BE-së gjatë Presidencës Bullgare. ‘Prioriteti i Bullgarisë për të punuar për integrimin evropian të rajonit është gjithashtu prioritet yni’, deklaroi Junckeri”.
Ekaterina Zaharieva, ministrja e Jashtme e Bullgarisë, ka deklaruar për 24 Çasa, se “Ballkani rrezikohet shumë nga ndërhyrja e Rusisë, ndaj ne duhet të mbështesim shumë vendet e rajonit, duke e lënë hapur derën e anëtarësimit”.
Shefja e diplomacisë bullgare deklaroi se Tirana dhe Shkupi pritet të kalojnë si “paketë” në samitin e Sofjes, duke lënë më pas në axhendë dy pikat më të vështira në Ballkan e që janë Bosnjë-Hercegovina dhe Kosova.
Zaharieva theson se “nuk duhet lënë në asnjë mënyrë vakum dhe të paktën për arsye gjeopolitike dhe të sigurisë europiane, BE-ja duhet të fuqizojë ‘muret’ e saj anësore që të mos goditen e plasariten”. /tesheshi com/
