Ndërkombëtarët pritet t’u kërkojnë në mënyrë të prerë të gjitha grupeve parlamentare që të deklarojnë qëndrimin politik nëse do ta votojnë apo jo reformën për drejtësi.
Siç mësohet, pas deklaratave të forta të ish-kryeministrit Sali Berisha në Kuvend për armatosjen e popullsisë, një dërgatë e lartë ambasadorësh do të zhvillojë takime zyrtare me krerët më të lartë politikë në vend, përkatësisht me kryeministrin Edi Rama, me kreun e PD-së, Lulzim Basha, me kryetarin e Kuvendit, Ilir Meta, e me kryetarin e PDIU-së, Shpëtim Idrizi.
Nga sa bëhet e ditur, një treshe ambasadorësh do të kërkojnë konferencë shtypi me politikanët kryesorë, e pas takimit do të shpallin qëndrimin e komunitetit ndërkombëtar, sipas të cilit nuk ka asnjë justifikim për të vonuar miratimin në Kuvend të reformës për drejtësi, ndaj kërkohet që të shpallet publikisht qëndrimi “Po” ose “Jo”.
Pas shprehjes së vullnetit, pritet që nga e enjtja e ardhshme parlamenti të mblidhet pa ndaluar, derisa të miratojë ndryshimet kushtetuese sipas vërejtjeve të Komisionit të Venecias.
Këto janë përfundimet e takimit të djeshëm të ambasadorëve të vendeve të BE-së dhe atij të Shteteve të Bashkuara të Amerikës, të cilët u alarmuan pas delaratës së Berishës për armatosjen e popullsisë.
Njoftohet se takimi i diplomatëve me krerët e partive politike do të zhvillohet ditën e hënë, dhe në fund ka mbizotëruar ideja se nuk do të ketë një takim paraprak me ish-kryeministrin Berisha, por vetëm me liderin e opozitës, Lulzim Basha.
Takimi i djeshëm është thirrur nga ambasadorja e Bashkimit Europian, Romana Vllahutin, dhe është biseduar gjerë e gjatë për situatën. Pritet që një dërgatë diplomatike të zhvillojë takime me kreun e opozitës shqiptare Lulzim Basha, dhe mbase edhe me doktor Berishën.
Situata është përshkallëzuar edhe nga jehona që i është dhënë në mediat e huaja deklaratës, që e kthen Shqipërinë në kohën e vitit 1997, pikërisht kur u duk se gjërat po stabilizohen.
Agjencia amerikane e lajmeve Associated Press ka qenë e para që ka botuar lajmin se ish-kryeministri bën thirrje për armatosje masive.
Lajmi i AP-ës është publikuar më pas në të gjitha gazetat e njohura amerikane, si te NY Times, Washington Post, etj.
“Ish-kryeministri u kërkon shqiptarëve të armatosen në mënyrë që të përballen me qeverinë,” thekson agjencia amerikane në lajmin e shkurtër, por që duket se ka depërtuar jo vetëm në opinionin publik, por edhe në kancelaritë perëndimore.
Nga sa mësohet prej burimeve diplomatike, ambasadorët vendosën që pas takimit me kreun e opozitës të shikohet dhe rruga e prononcimit në publik.
Nëse do të ketë një reflektim nga Basha, por duke dhënë garanci për reformën, atëherë pritet që gjithçka të vazhdojë në mënyrë të qetë.
Përndryshe, sipas të gjitha gjasave, ndërkombëtarët do të reagojnë fort, duke përmendur edhe emrat konkretë.
Tonet u ngritën shumë pas ardhjes së kryeministrit Edi Rama nga SHBA-ja dhe angazhimit të Uashingtonit për reformën në drejtësi.
Në fjalën e tij në parlament, kryeministri Rama tha se “opozita do ta votojë se s’bën reformën, madje edhe duke ngritur këmbën”. Ky qëndrim duket e ka irrituar Berishën, i cili u nis për një qëndrim më pak drastik, por e tejkaloi masën, duke e pranuar edhe vetë në një farë mënyrë kur e korrigjoi deklaratën. /tesheshi.com/
