Mësohet një nga arsyet që kanë shtyrë Sekretarin Amerikan të Shtetit, John Kerry, të ndërmarrë një udhëtim direkt në Tiranë, ku do të zhvillojë një vizitë zyrtare 3-orëshe ditën e dielë.
Siç mësohet nga burime jo zyrtare, Sekretari Kerry, përveç takimeve që do të zhvillojë me Kryeministrin Edi Rama dhe liderin e opozitës, Lulzim Basha për çështjen e reformës në drejtësi, do të diskutojë edhe një çështje të rëndësishme që kanë të bëjnë me problem të politikës ndërkombëtare.
Prej vitesh, në Tiranë ka ardhur një kontigjent të arratisurish politik nga Irani, të cilët përndiqen nga regjimi i Teheranit.
Prej vitit 2003, një grup nga të ashtuquajturit “Muxhahidinët e Popullit”, janë të strehuar në Liberty Camp në Irak. Ata mbahen me shpenzimet e familjeve të anëtarëve të opozitës iraniane që ndodhen në Perëndim, të cilët japin fonde për të mbajtur bashkëpatriotët e tyre.
Në Liberty Camp ndodhen rreth 2500 anëtarë të opozitës iraniane të cilët çdo ditë janë të rrezikuar me jetë. Disa herë ky kamp është bombarduar me raketa dhe kanë gjetur vdekjen dhjetëra vetë, mes të cilëve edhe të moshuar dhe fëmijë.
Sekretari Amerikan i Shtetit vjen në Tiranë për t’i kërkuar qeverisë shqiptare strehimin e pjesës tjetër të muxhahidinëve që ndodhen në Irak.
Rreth 1 mijë refugjatët politikë që janë strehuar në Shqipëri që në vitin 2012, në fillim qëndruan në kampin e UNCHR-së në Babrru, pastaj janë shpërndarë në disa qytete të Shqipërisë ku jetojnë me të ardhurat e tyre, duke marrë shtëpi me qira. Siç i tha tesheshi.com njëri prej tyre, ata nuk marrin asnjë ndihmë, qoftë nga OKB-ja apo nga qeveria shqiptare.
Kostoja e secilit prej tyre shkon në 600 dollarë në muaj.
Një pjesë e këtyre refugjatëve janë në procedura për të marrë shtetësinë shqiptare, ndërsa disa të tjerë kanë marrë shtetësinë amerikane. Ata presin të ikin në Perëndim pasi këtu nuk gjejnë punë dhe kanë vështirësi të integrohen.
“Muxhahidinët e popullit” janë një organizatë antagoniste me regjimin iranian dhe përndiqen prej vendit të tyre. Fillesa e organizatës u ngrit nga një grup ushtarakësh që gjatë luftës ndërmjet Iranit dhe Irakut që u akuzuan se kanë bashkëpunuar me Sadam Hyseinin kundër vendit të tyre. Por ata e kundërshtojnë këtë tezë, duke thënë se ata janë një organizatë që kërkon demokraci në vendin e tyre.
Kupola e organizatës ndodhet në Paris ku çdo vit mbajnë një samit të madh ku marrin pjesë personalitete nga e gjithë botë.
Në vitin 2014, ishte i ftuar nga Shqipëria, ishkryeministri Sali Berisha, i cili dhe përshëndeti të pranishmit.
Përgatiti: Ylli Pata – /tesheshi.com/
