Vendimi i Edi Ramës për të ndaluar lënien e mandateve të deputetit nga ministrat është marrë vetëm ditën e fundit ku shpalli emrat e ministrave të rinj, pikërisht duke prishur një pakt të fshehtë me Ilir Metën që e lidhën ditën kur ish-kreu i LSI-së pranoi që të bëhet President i Republikës.
Në listat për deputetë të PS në disa qarqe, poshtë vijës së pritshmërive dhe afër mundësisë që projketohej nga sondazhet e atëhershme, ndodhen emra që janë vendosur nga pakti sekret Rama-Meta, në mënyrë që LSI të kishte edhe deputetë të tjerë përveç 19 të vetëve.
Meta, që luante me dy fronte, duke mbështetur çadrën e PD-së, por edhe duke rritur pazarin ndaj Edi Ramës për koalicionin, për të cilin deri atëherë kryetari i PS-së lutej e lutej, por merrte vetëm frazën “prit” nga kreu i LSI-së, kishte menduar të përdorte dy skenarë.
Njëri ishte që të mbështeste fuqishëm çadrën duke detyruar Edi Ramën të tërhiqej dhe më pas situata do të ishte një përpjetë e pandalshme e PS-së, e cila edhe nëse fitonte në zgjedhje nuk do të ishte e mundur të qeveriste.
Por kur çadra nuk po jepte rezultat dhe Rama nuk tërhiqej, Meta doli në skenë duke paralajmëruar edhe largimin e ministrave të tij nga qeveria për siç thoshte ai “shpëtimin e zgjedhjeve”.
Por sërish kërcënimet nuk po pinin ujë. Në Tiranë erdhën delegacione nga e gjithë Europa që i kërkonin publikisht PD-së që të hynte në zgjedhje.
Ardhja e fundit ishte e McAllister, që sërish u refuzua nga Basha dhe vendi po shkonte drejt bojkotit të opozitës.
Komisioneri Johannes Hahn shkroi thirrjen e hapur drejtuar shqiptarëve që mund të shprehnin votën edhe pse opozita nuk merr pjesë.
Pikërisht në këtë kohë Ilir Meta pranoi ofertën e Edi Ramës për tu bërë President i vendit, por i kërkoi që të vendoseshin një numër kandidatësh të LSI-së në listat e PS-së, në mënyrë që të kishte një “valvul sigurese” që Rama nuk do ta tradhëtonte.
Altin Kazaj, në numër rendor 9 në Durrës i përkiste LSI-së. Spartak Braho, i 19-i në listën e Tiranës, gjithashtu ishte njeri i Metës, edhe pse i ftohur me të pas 17 majit. Thuhet se ishin 5 të tillë në të gjithë vendin.
Dhe kështu Meta dhe Rama i dërguan emrat zyrtarisht në KQZ me mendimin se do të qeverisnin në koalicion paszgjedhor me njëri-tjetrin.
Sipas projeksioneve në kokën e tyre vendet e opozitës do të ziheshin nga LIBRA e Blushit, Sfida e Bojaxhiut, PSD e etj.
Por plani i Metës u prish nga marrëveshja e 17 majit Basha-Rama.
Tani komplikohej gjithçka për LSI-në dhe pakti me Ramën i tregoi Metës se lëvizjet e tij kishin qenë jo vetëm një lojë amatorësh, por të gjitha sondazhet e thonin që PS-ja mund të arrijë në nivelin që në fund e preku.
E kapja e 74 mandateve rrëzoi tërë planin që Ilir Meta kishte hartuar në kokë që prej vitit 2015.
Kjo pasi çdo njeri që i kishte premtuar besnikëri para 25 qershorit mund të lëvizte dhe këtë e dinte mirë kreu i LSI-së, i cili kishte bërë provën më të fuqishme në verën e vitit 2016 për të rrëzuar Edi Ramën si kryeministër, por nuk ja doli dot.
Tashmë që zgjedhjet kanë përfunduar mësohen edhe disa detaje të lëvizjeve e kryera që njerëzit e LSI-së në listat e PS-së të mos futeshin në Parlament.
Në Durrës për shembull, Vangjush Dako i ka thënë Edi Ramës se mund të arrinte në numrin e 9 deputetëve, por në fund ai ka ndihmuar që të dalë më mirë Florion Mima i PD-së, sesa njeriu i Metës në listën e PS-së.
Kjo u vu re edhe në Tiranë, ku lista ndali te numri 18, duke e lënë jashtë Kuvendit “Baba Takun”.
Më pas Edi Rama mori vendimin për të mos e aplikuar rotacionin e ministrave me deputetëve çka pengoi përfundimisht depërtimin e njerëze të LSI-së.
Nuk është çudi që sulmet e forta ndaj Bashës në PD t’i mbështesë edhe LSI, gjë që janë bërë edhe nga analistët e atashuar të saj.
Artur Zheji për shembull, edhe pse ka qenë këshilltar i afërt i Lulzim Bashës në vitin 2011, pas 25 qershorit e sulmoi ashpër.
Loja tani është e përqendruar tek reforma zgjedhore apo sistemi që do të zgjedhë Basha me Ramën, që duket do ta zgjidhin sërish bashkë pavarësisht me mënyra të tjera konfigurimin e ri politik. /tesheshi.com/
