Kush janë deputët e PS-ë që Meta mund t’i përdorë si shantazh për Ramën pas zgjedhjeve?
Ilir Meta i ka dërguar dy mesazhe të forta Kryeministrit Edi Rama, ku i bën të ditur se nuk do ta lërë të qeverisë asnjë ditë nëse qeveria do të pakësojë votat e LSI-së nëpërmjet shkarkimeve të militantëve të partisë së Ilir Metës dhe hetimit ndaj disa zyrtarëve të tjerë.
Mesazhet i janë dërguarr Edi Ramës në telefon para dy ditësh, pikërisht kur kishte nisur një hetim i policisë ndaj kryeadministratorit të njësisë numër 2 në Tiranë Elez Gjoza, i cili është një njeri i afërt i Metës dhe çelës që LSI të arrijë rezultat të konsiderueshëm.
Vetë Presidenti i zgjedhur është angazhuar personalisht në njësinë 2 në Tiranë, e cila është një nga më të mëdhatë që të rrisë mbështetjen e partisë së tij.
Lajmi për hetimin e Elez Gjozës, ish-truprojë e Maqo Lakrorit dhe president i Federatës së Peshëngritjes, ka dalë vetëm ditën e sotme nga ana e policisë së shtetit.
Por siç mësohet, Meta ka përdorur ndaj Ramës një frazë të fortë që i bën të ditur se do ta quajë përgjegjës për prishje të zgjedhjeve nëse dëmton LSI-në.
Madje, Meta i ka thënë kryeministrit se nuk do ta lërë të qeverisë asnjë ditë pas 25 qershorit, edhe nëse arrin të marrë shumicën e votave.
Një mesazh të tillë njeriu që më 24 korrik duhet të përfaqësojë unitetin e popullit e ka dhënë edhe gjatë intervistës me Blendi Fenvziun.
Ilir Meta, i cili u shfaq dukshëm i ezauruar nervash dhe i tensionuar, deklaroi se do të bashkëpunonte me deputetë të PS-së dhe të PD-së për të ndaluar një qeverisje të Edi Ramës dhe Lulzim Bashës.
Po kush janë “talpat” e Metës brenda grupit të Ramës dhe të Bashës që mund të rrezikonin të hynin në qeveri dhe të bashkonin votat me LSI-në?!
A është real mesazhi i Metës, pra a ka bazë në terren, apo është një shantazh që përcillet si mesazh tek votuesit, pra që LSI gjithsesi do të jetë forcë qeverisëse dhe pa të nuk do të ketë një qeveri?!
Më shumë gjasa ka kjo e dyta, pra që Meta dërgoi një shantazh për PS dhe mesazh për votuesit pragmatistë të LSI-së që të mos e braktisin, se ajo në mos nuk do të jetë në qeveri, do të pengojë të formohet çdo qeveri që mund të bëhet pa të.
Pra do të vazhdojë te jetë “kingmaker”.
Por edhe e para, pra që Meta ka njerëz brenda nuk përjashtohet.
I pari që është i dukshëm dhe del menjëherë në sipërfaqe është Baba-Taku, deputeti që vendoset “peng” i marrëveshjes PS-LSI në listat e Edi Ramës. Spartak Braho është sërish fitues në listat e PS-së së Tiranës, ashtu si 4 vjet më parë i njëmbëdhjeti.
Por nuk përjashtohet që të mos jetë i vetmi.
Ilir Meta përmendi për herë të parë atë që tesheshi.com e kishte shkruar që në vitin 2015, pra që disa deputetë socialistë kanë kaluar me Metën.
Dhe të cilët kryetari i Kuvendit i mori me vete në vizitën e tij në Athinë për të bërë karshillëk ndaj Edi Ramës.
Meta përmendi Parid Carën, deputetin e PS-së së Kavajës, që nuk ndodhet më në listat e deputetëve.
Por këtë e bëri vetëm për presion, pasi emra të tjerë ka disa.
Edhe Arta Dade duket se është penalizuar në mospërfshirje në listë pikërisht për shkak të lidhjes së ngushtë me Ilir Metën dhe veçanërisht për udhëtimin e Athinës.
Siç mësohet këta ish-deputetë të PS-së kanë nisur punën në bazë që të mbledhin vota për LSI-në dhe që të devijojnë militancën socialiste me anë të fabulës se “Edi Rama nuk e mban fjalën dhe të braktis”.
Por Meta iu referua njerëzve brenda listës.
Anastas Angjeli për shembull, ish-ministër i Metës dhe pjesëtar i “shpurës së Athinës” është në listën fituese të Elbasanit.
Por siç mësohet ka edhe të tjerë.
Edi Rama e di këtë shumë mirë. Madje i ka pranuar me vetëdije për të “peshkuar” rivalin e tij.
Ai numrat i ka siguruar diku gjetkë, sipas gjasave me Bashën, pakt që pritet të noterizohet nga amerikanët vetëm pak ditë para 25 qershorit.
Ndaj është egërsuar shumë Ilir Meta. Pasi numrat kësaj radhe janë bërë relativë. Aritmetika është shndërruar në gjeopolitikë…
/tesheshi.com/
