Policia ka shpallur për mediat masat e protestës së nesërme të opozitës.
Por nga ana tjetër, policia duket se ka provokuar LSI-në pasi ka bërë të ditur se janë vënë nën vëzhgim disa militantë të kësaj force politike, të cilët janë pikasur si të dhunshëm.
Nesër opozita do të protestojë në mesditë, protestë që nis nga ora 12.00 përpara kryeministrisë dhe leja zyrtare është për 4 orë manifestim. Gjasa ka që protesta të zgjasë deri në orët e mbrëmjes.
Rreth 1500 policë janë të angazhuar në terren për mbarëvajtjen e protestës. Të angazhuar do jenë FNSH, Forcat e Rendit dhe ato operacionale.
Në terren do të ketë edhe agjentë civilë dhe të Shërbimit Informativ Shtetëror (SHISH).
Synimi është shmangia e incidenteve dhe një tentativë e mundshme e protestuesve për të sulmuar institucionet, pavarësisht se organizatorët e kësaj proteste si kreu i PD, Lulzim Basha ashtu edhe ajo e LSI, Monika Kryemadhi kanë mohuar ekzistencën e skenarëve të dhunës.
Rrugët që bllokohen
Policia e kryeqytetit ka marrë masa edhe për rrugët të cilat do bllokohen orët e para të mëngjesit të nesërm e deri në përfundim të protestës. Kështu, në të gjitha rrugët që të çojnë drejt Bulevardit “Dëshmorët e Kombit” nuk do lejohet qarkullimi i automjeteve përveç mjeteve të transportit publik.
Ndërsa sa i takon automjeteve me të cilët do vijnë protestuesit nga rrethet, bëhet e ditur se nuk do lejohet hyrja e tyra në Tiranë.
Mjetet që vijnë nga jugu dhe veriu do ndalohen te pallati i sportit “Asllan Rusi”, ndërsa ata të juglindjes, te stacioni i autobusëve pranë Fakultetit Ekonomik te “Rruga e Elbasanit”. /tesheshi.com/
