Statujat e perëndive në Greqinë dhe Romën e lashtë ishin… të parfumuara dhe të zbukuruara me kurora dhe garlanda aromatike me lule. Të paktën kështu shkruan historiania daneze Cecilia Broens në një artikull të botuar në internet në Oxford Journal of Archaeology.
Cecilia Broens, kuratore e Glyptotek të Kopenhagenit, pasi analizoi burimet, zbuloi se njerëzit në kohët e lashta jo vetëm që parfumosnin veten, por shpesh edhe statujat e perëndive në tempuj.
Ndryshe nga parfumet e sotme, sipas Broens, parfumet e asaj epoke bazoheshin në yndyrë ose vaj, kështu që përhapeshin si krem. Në vendet mesdhetare, për shembull, trëndafili ishte një përbërës i zakonshëm në parfumeri.
Kurora dhe garlandët me lule që zbukuronin statujat e perëndive ofronin kështu një tjetër përvojë përjetuese. Edhe pse këto parfume nuk mund të identifikohen sot, thotë historiania, janë gjetur përshkrime të tyre dhe kopje të bëra prej metalesh, terrakote dhe ari, ndërsa i gjithë procesi njihej si “kosmesis”. Kjo përfshinte edhe dekorimin e statujave me pëlhura dhe bizhuteri.
Statujat e perëndive trajtoheshin gjithashtu me vaj ulliri ose dyllë blete. Kjo sigurisht i bëri ato të shkëlqenin, por në të njëjtën kohë mbrojti edhe ngjyrën e tyre.
Tani dihet se skulpturat prej mermeri të bardhë që mund të shihen sot në muze nuk përfaqësojnë në asnjë mënyrë artin e lashtë, thekson historiania. Përkundrazi, është vërtetuar se skulpturat e lashta, qofshin prej druri, terrakote apo guri, ishin gjithmonë të pikturuara. /DW/
