Statuja të lashta, monedha, bizhuteri dhe vezë të paprekura nga koha romake dhe etruske janë zbuluar në burimet e nxehta të San Cassiano dei Bani në Toskanën jugore, tha ministria e kulturës e Italisë, duke paraqitur gjetjet më të fundit.
Gërmimet në San Cassiano dei Bani, një qytet rreth 160 kilometra në veri të Romës, filluan në vitin 2019, dhe në vitet e mëparshme arkeologët kanë gjetur shumë thesare të rëndësishme në zonë.
San Cassiano, në majë të një kodre, kishte një vend të shenjtë të lidhur me burimet e nxehta që ishin përdorur për qëllime terapeutike që nga shekulli III para Krishtit, tha ministria. Etruskët dhe romakët linin aty blatime kushtimi, të cilat tani po dalin në dritë.
Në një thellësi prej gati pesë metrash, arkeologët gjetën statuja bronzi të burrave dhe grave, duke përfshirë një të prerë për së gjati. Ata gjetën gjithashtu mijëra monedha, një kurorë dhe unazë të artë, gurë të çmuar dhe shumë skulptura gjarpërinjsh. Njëri prej tyre është rreth një metër i gjatë dhe besohet se përshkruan Agathodaemon, një perëndi me mjekër, gjarpër, me brirë të mitologjisë greke. Kjo lloj hyjnie mund të ketë qenë, sipas bestytnive pagane të kohës, mbrojtësi i burimeve, sipas ministrisë.
Sa për Agathodaemon, kjo është statuja më e madhe prej bronzi e perëndisë e gjetur deri më sot. Më të voglat mbahen në Muzeun Britanik dhe Muzeun Arkeologjik Kombëtar të Napolit.
Mijëra lëvozhga vezësh u gjetën gjithashtu në vend, si dhe vezë të tëra, me vrima të vogla nga të cilat duket ende e verdha e paprekur. Kishte edhe degë të zbukuruara me bimë dhe kone pishe, që besohet se ishin të destinuara për faltoren.
Thesaret e San Cassiano u ruajtën në këtë gjendje falë baltës së nxehtë të burimeve. Ato do të ekspozohen në një muze të ri i cili do të funksionojë në qytet në fund të vitit 2026. /tesheshi.com/
