Në një reportazh të ATSH-së, shkruhet se shtetas nga Arabia Saudite, duke përfituar nga heqja e vizave, e kanë kthyer Shqipërinë në një destinacion të preferuar. Gazetari Harilla Koçi ka shkuar në pikën turistike të Llogarasë, ku është informuar mbi “dyndjen arabe” atyre anëve.
“Kjo zonë malore, ndër më tërheqëset në Shqipëri, është shndërruar tashmë në një destinacion turistik mjaft të spikatur për shtetasit nga Arabia Saudite, ashtu si edhe qindra të tjerë nga vende të ndryshme të botës. Kam qenë dëshmitar këto ditë për praninë e turistëve arabë në Llogora, të cilët spikasin dukshëm krahasuar mes atyre nga vende të tjera edhe për shkak të veshjes së femrave (perçja)”, shkruan ai.
Gazetari citon një pjesëtar të stafi të fshatit turistik, “Llogora”, i cili thotë se “turistët nga Arabia Saudite, preferojnë të bëjnë pushime në zona malore” e se “një pasdite, ndërsa Parku Kombëtar i Llograsë u pushtua nga reshjet e shiut, shtetasit arabë, të mëdhenj e të vegjël, i gëzoheshin asaj çka përjetonin. Shiu ishte për ta, një fenomen mahnitës. Qëndronin jashtë viletave të tyre dhe shijonin rrebeshin e shiut që i lagte”
Më tej, punonjësi thotë se ata “shpesh, për shkak të veshjes së tyre, ato (gratë) shihen tinëz nga pushuesit e tjerë dhe turistët e huaj, që janë të shumtë në këtë resort. Por, këto vështrime, që nuk shprehin asgjë, përveçse një kuriozitet, nuk zgjasin shumë. Në tërësi, ky mjedis mbledh së bashku turistë nga vende të dryshme të botës dhe, shtetasit arabë, janë mes tyre, madje ndër ta që, për momentin përbëjnë shumicë në atë komunitet, që i ka mbledhur së bashku, në një vend, synimi për të pushuar, për të kaluar disa ditë në një vend të qetë, të gjelbër dhe me kushte komode”, shkruhet ndër të tjera në reportazhin e gazetarit Harilla Koçi. /tesheshi.com/
