“Rreth 720 mijë euro, kanë paguar pushtetet lokale për zbukurimin e rrugëve dhe shesheve të Maqedonisë për festën e Vitit të Ri”, kështu tregon analiza e Qendrës për Komunikime Civile.
Prokurime publike për zbukurim të rrugëve dhe shesheve kanë pasur qyteti i Shkupit dhe 25 nga 80 komunat dhe Qendra Tregtare e Shkupit. Tetë nga 25 komunat janë të Shkupit (Qendër, Karposh, Çair, Gazi Babë, Gjorçe Petrov, Saraj dhe Shtuo Orizare), ndërkaq 17 komunat tjera janë: Kumanova, Manastiri, Prilepi, Strumica, Tetova, Ohri, Struga, Kërçova, Resnja, Velesi, Probishtipi, Novaci, Kavadari, Radovishi, Vallandova dhe Gjevgjelia.
Sipas disa marrëveshjeve dhe vlerësimit të tenderëve të publikuar, dalin se për në Shkup janë harxhuar 430 mijë euro, që i bie më shumë se gjysma e gjithë komunave tjera, për të cilat janë ndarë 290 mijë euro.
Sipas vlerës, për zbukurimin e rrugëve dhe shesheve pushteti ka lidhur marrëveshje me ndërmarrjen Link Media Plus DOOEL import-eksport Shkup. Kompania ka fituar tenderë me vlerë prej 10.4 milionë denarë, gjegjësisht rreth 170 mijë euro.
E dyta në rang-listën sipas vlerës së harxhimeve në bazë të marrëveshjeve është Komuna e Karposhit, e cila ka nënshkruar marrëveshje Link Media Plus DOOEL import-eksport Shkup, me vlerë prej 3.4 milionë denarë, gjegjësisht 80 mijë euro.
E treta është Komuna e Qendrës që ka harxhuar 3.4 milionë denarë, gjegjësisht 55 mijë euro. Pastaj vjen Komuna e Manastirit me 2.8 milionë denarë, gjegjësisht 45 mijë euro.
Kumanova ka harxhuar 1.8 milionë denarë, gjegjësisht 29 mijë euro, ndërkaq Tetova vetëm 1.4 milionë euro, gjegjësisht 23 mijë euro./tesheshi.com/
