Liderët e vendeve të Ballkanit Perëndimor nënshkruan të enjten në Berlin tre marrëveshje rajonale që do të lejojnë lëvizjen e lirë me karta identiteti në rajon, njohjen e kualifikimeve të arsimit të lartë dhe kualifikimet profesionale për mjekët, stomatologët dhe arkitektët.
Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, vlerësoi se tri marrëveshjet e nënshkruara në tregun e përbashkët rajonal janë vendimtare për qëndrueshmërinë ekonomike.
“Ballkani Perëndimor duhet të jetë i qëndrueshëm, nuk duhet të ketë as hapjen më të vogël për intriga në rajon. Është një moment për të kapërcyer trashëgiminë e së kaluarës”, shkroi Borrell në Twitter.
Njëra nga marrëveshjet e nënshkruara përfshin dhe atë për lëvizjen e lirë me karta identiteti dhe heqjen e regjimit ekzistues të vizave ndërmjet Bosnjës- dhe Kosovës.
Përveç Serbisë, Bosnja është i vetmi vend në rajon që nuk e njeh pavarësinë e Kosovës dhe i vetmi vend në rajon që ka regjim të vizave me Kosovën.
Marrëveshjet do të hyjnë në fuqi pasi të kalojnë procedurën e ratifikimit në parlamentet shtetërore të të gjashtë vendeve të rajonit, gjë që duhet të ndodhë në vitin 2023. /tesheshi.com/
