Zbardhet vizita e papritur e kryeministrit serb, Aleksandër Vuçiq në Rusi, ku u thirr në mënyrë urgjente nga presidenti Vladimir Putin.
Mediat serbe dhe ata ruse theksojnë se shefi i Kremlinit i ka bërë presion të pastër dhe të fortë Vuçiqit për të futur në qeveri pasardhësin e Sllobodan Millosheviqit, përkatësisht zv.kryeministrin në detyrë, Ivica Daçiq dhe të mos fusë shqiptarët e Preshevës në kabinet.
E përditshmja e Beogradit Veçernie Novosti, citon kryeministrin serb të ketë thënë se “priten stuhi gjatë kthimit të tij në kryeqytet, dhe se sido që të jetë kompozimi i qeverisë duhet që të mos preken marrëdhëniet e mira mes Federatës Ruse dhe Serbisë”.
Veçernje Novosti thekson më tej se Putin ka arritur të përçajë në mes grupin parlamentar të partisë në pushtet SNS, një pjesë e të cilëve kërkon që të mbahet Daçiq si numri dy dhe të mos thirren përfaqësuesit e Partisë për Aksion Demokratik të Riza Halimit.
Moska, me anë të një letrë të fundit ka falënderuar Ivica Daçiqin për “drejtimin e kënaqshëm të presidencës së OSBE-së”, çka është një ndërhyrje direkte në punët e brendshme për të treguar se kë ka Rusia si t ë preferuarin e saj në politikën serbe.
Sipas së përditshmes serbe, Putin kërkon që të mbajë në qeveri edhe ministrin e Energjisë,
Dushan Bajatoviq, në mënyrë që të kontrollojë edhe kompaninë shtetërore, Srbijagas, e cila i ka miliarda euro borxh gjigandit rus Gazprom.
Gjithashtu Putin i ka dhënë një ultimatum të fortë kryeministrit serb që të mos emërojë si ministra “euroatlantikët” siç quhet kreu i liberaldemokratëve Çedomir Jovanoviq, si dhe kreu i Partisë shqiptare për Aksion Demokratik, Riza Halimi. /tesheshi.com/
