Zbardhet revolta e gjyqtarëve: ja përplasjet me ministren Gjonaj në KLD-në e drejtuar nga Ilir Meta

Nga Ylli Pata

Edhe pse reforma në drejtësi ka hyrë në fazën e zbatimit dhe nga dita në ditë pritet të fillojë vettinu, në pjesët e mbetura të sistemit vazhdon përplasja mes sistemit të ri me atë të vjetër.

Siç mësohet, në mbledhjen e djeshme të KLD-së që drejtohet nga Presidenti i Republikës Ilir Meta, ka pasur debate të ashpra ndërmjet ministres së Drejtësisë dhe anëtarëve.

Debati është bërë për të shpëtuar apo për të dënuar një numër gjyqtarësh që kishin marrë masa disiplinore nga dy ish-ministrat, Ylli Manjani dhe Nasip Naço. Ministrja aktuale e Drejtësisë, Etilda Gjonaj, kishte propozuar shkarkimin e 10 gjyqtarëve dhe masa disiplinore ndaj tre sosh. Por KLD vendosi rrëzimin e propozimeve të saj për shkarkim.

Ministrja Gjonaj akuzoi KLD-në se me qëllim nuk ka marrë në shqyrtim kërkesat për masa disiplinore, duke e lënë pezull për 6 muaj. Ajo mësohet se ka sulmuar direkt Presidentin e atëhershëm, Bujar Nishani, i cili ishte kryetar i KLD-së.

Këshilli i Lartë i Drejtësisë, edhe pse e ka mbaruar fuqinë e tij ligjore, po qëndron në fuqi si i “komanduar”, ngaqë nuk është ngritur ende Këshilli i Lartë Gjyqësor.

Në një farë mënyre po përplaset sistemi i vjetër me të riun, që gjyqtarët e propozuar për shkarkim dhe masa disiplinore të shkojnë përpara vettingut pa u “njollosur”.

Ditën e djeshme mësohet se Presidenti Meta nuk ka hyrë ne debatin e palëve por vetëm e ka moderuar atë. Pjesëtarët e KLD-së që vijnë nga gjyqësori, e kanë kundërshtuar ashpër ministren e Drejtësisë, duke thënë që e gjitha është një montaturë politike.

Kjo revoltë e gjyqtarëve të sistemit është një rizgjim i çuditshëm i organit që drejtohet nga Ilir Meta, që i çon një mesazh të fortë mazhorancës por edhe ndërkombëtarëve, që kërkojnë një tronditje në sistem. “Deri tani nuk mund të ndryshoni njerëzit”, duket se është mesazhi i koduar i Metës.

Pak ditë më parë, ambasadori amerikan Donald Lu duke folur në Zërin e Amerikës dërgoi një sinjal të prerë për atë pjesë politike që nuk pranon reformën në drejtësi.

Pas fjalës së Donald Lu-së, rebelimi i gjyqtarëve është edhe prova se kjo luftë jo vetëm nuk ka mbaruar, por duket se do të bëhet deri në momentin e fundit…/tesheshi.com/