Zbulohet plani sekret i përfshirjes së Shqipërisë në komplotin që kishte si synim marrjen peng ose vrasjen e kryeministrit të Malit të Zi, Milo Gjykanoviç, në ditën e zgjedhjeve të 21 tetorit në Podgoricë.
Shërbimet sekrete të NATO-s kanë alarmuar autoritetet shqiptare e në veçanti strukturat antiterror të Policisë së Shtetit për të parandaluar hyrjen e grupit të dytë që do të vinte nga Shkodra dhe që kryesisht ishte grup i logjistikës.
Në mënyrë të fshehtë janë kapur në Shkodër një sasi e madhe armësh në një vend sekret, të cilat do të transportoheshin në Podgoricë për t’u përdorur nga grupi që u arrestua nga policia malazeze.
Prokurori Special i Malit të Zi, Milivoje Katniç, deklaroi se ishin planifikuar që të kalonin kufirin nëpërmjet lumit Buna, një varkë e mbushur me armatim dhe municion.
Kantiç ka deklaruar se operacioni është bërë në bashkëpunim me organet shqiptare.
Por për këtë çështje ka një heshtje totale të shtetit shqiptar, i cili do të duhet të zbardhë të gjithën për publikun, pasi bëhet fjalë për ekzistencën e një grupi të frikshëm që ka gjasa të jetë aktiv dhe të ndezë trazirat në vendin tonë.
Shërbimet partnere e kanë vënë në dijeni Tiranën zyrtare prej kohësh për rrezikun e një plani për të trazuar ujrat në Shqipëri, por edhe në të gjitha trevat që banohen nga shqiptarë në Ballkan.
Sasi të mëdha financimesh janë hedhur nga qarqe të fuqishme që po nxisin një frymë antiperëndimore të opinionit publik në vend.
Pasi tentuan të krijonin një klimë për të fajësuar muslimanët shqiptarë për ekstremizëm, por që nuk piu ujë, janë hedhur në terren elemente nga më të tmerrshmit kriminalë që do të përdoren në veri dhe në jug të vendit.
Mësohet se ka një lloj koordinimi mes interesave ruse dhe atyre greke për të stopuar avancimin normal të vendit dhe për të kthyer proceset prapa.
Qëllimi i përfshirjes së Shqipërisë në një komplot në Malin e Zi ka të bëjë pikërisht me ndezjen e një vatre brenda një vendi anëtar të NATO-s dhe kthimin e Shqipërisë gati 10 vjet prapa, pasi mund të rrezikohej edhe anëtarsimi në organizatë.
Por tani që u zbulua, mësohet se një hetim i hollësishëm po bëhet për të gjetur të gjithë elementët e një destabilizimi.
Jaën e ardhshme në brigjet shqiptare do të vijnë dy luftanije të shteteve anëtare të NATO-s si për të dhënë sinjal politik ndaj nxitësve të destabilizimit.
Mësohet se një nga anijet që do të instalohet në ujrat e Gjirit të Vlorës do të jetë turke dhe do të zhvillojë një stërvitje të përbashkët me trupat shqiptare të Flotës Detare për të patrulluar luftën ndaj trafiqeve.
Ndërkaq një anije shqiptare ndodhet përkrah atyre turke në Detin Egje për të patrulluar. /tesheshi.com/
