Nga Ylli Pata
Zbardhet thelbi i paktit që i është propozuar në Bruksel Lulzim Bashës për Prokurorin e Përgjithshëm.
Siç mësohet, kreut të opozitës i është propozuar nga krerët e PPE-së që ai të bëhet pjesë e zgjdhjes së kreut të ri të gjyqësorit, duke filluar nga Prokurori i Përgjithshëm, si dhe të japë “ok” për hapjen e negociatave për anëtarësim.
Bashkimi Europian, përkatësisht krerët e PPE-së janë propozuar të jenë pjesë e një procesi garancie ndaj PD-së dhe opozitës në lidhje me funksionimin e organeve të reja të drejtësisë, dhe në radhë të parë të dosjeve të hapura apo atyre që janë denoncuar për pjesëtarë të qeverisë dhe opozitës.
Lulzim Basha ka rënë dakord që të bëhet pjesë e një procesi për Kryeprokurorin e ri, por ai nuk do ta njohë dhe do të kundërshtojë emërimin e Kryeprokurorit të Përkohshëm. Basha ka thënë që Adriatik Llalla duhet të qëndrojë në punë derisa të formohet KLP-ja dhe të zgjidhet Kryeprokurori i ri.
“Sa për Prokuror të Përgjithshëm të përkohshëm, është më normal që procesi të jetë brenda paramentrave normale të vakumit të pushtetit, kur drejtuesi që e ka përfunduar mandatin qëndron në detyrë derisa të qëndrojë i riu”.
Ndërkohë, mësohet se afati për të ndryshuar Kryerokurorin është vënë 20 nëntori. Kjo pasi atëherë pritet të fillojë operacioni i madh ndaj “peshqit e mëdhenj”.
SHBA dhe BE i kanë bërë të ditur edhe Ramës edhe Bashës se brenda datës 20 dhjetor do të duhet të jetë larguar Adriatik Llalla nga zyra e Prokurorit të Përgjithshëm.
Pritet që deri më datën 20 të ketë një rezistencë të madhe nga PD-ja dhe LSI-ja për ta ndaluar zgjedhjen e Prokurorit të Përkohshëm.
Ndoshta mund të ketë edhe veprime apo akte të forta proteste apo ndonjë “surpizë” që po gatuhet këto ditë.
Pritet ndërkohë që në proces të hyjë edhe Presidenti i Republikës Ilir Meta, i cili ende është kryetar i KLD-së dhe ka të drejtën kushtetuese të bëjë shkarkimet dhe lëvizjet e prokurorëve, deri sa të instalohet Këshilli i Lartë i Prokurorisë.
Një nga përfaqësuesit e Grupit Ndërkombëtar të Monitorimit, gjermani Reinard Priebe ka deklaruar se vonesa e vettingut ka komplikuar gjithçka.
“Sa më shumë vite kohë të marrë proçesi i zgjerimit me Shqipërinë dhe vendet e tjera aq më shumë njerëzit këtu janë bindur se sa esenciale është ndërtimi i një drejtësie të pavarur dhe funksionale për demokracinë në vend. Është me rëndësi që të shpejtohet proçesi i vetingu që është vonuar në mënyrë të konsiderueshme deri tani”, u shpreh Priebe.
Një deputet i mazhorancës ka bërë të ditur ndërkohë që Adriatik Llalla do të rrij në detyrë deri në fundin e dhjetorit, pra edhe pas mbarimit të mandatit.
“Sot ka nisur procedura dhe brenda 5 ditëve do të bëhen publikë emra e atyre prokurorëve që do të paraqiten si kandidatura dhe më pas ata do të paraqiten në komisionin parlamentar të ligjeve.
Pas seleksionimitt dhe paraqitjes së platformave të tyre në seanca të posaçme dëgjimore kandidatët do të votohen në kuvend i cili nëpërmjet votave do të zgjedhë prokurorin e Përgjithshëm të Përkohshën.
Periudha e punës së tij do jetë e shkurtër sepse shumë shpejt do zgjidhet institucioni i Këshillit të Lartë të Prokurorisë që do të zgjedhë kryeprokurorin e ri për një mandat 7-vjeçar.”/tesheshi.com/
