Ishte planifikuar që Federica Mogherini, shefja e diplomacisë së BE-së që viziton të shtunën Tiranën, të kishte një takim më të gjatë me Lulzim Bashën ku të dilnin së bashku në një konferencë shtypi e të shpallnin një plan për dalje nga kriza apo nga çadra, quajeni si të doni.
Por pas krizës së papritur në Maqedoni dhe telasheve në Bosnjë ku ajo nuk u ul si pasojë e largimit në Rusi të presidentit të serbëve të Bosnjës, Milorad Dodik, mësohet se axhenda është shkurtuar.
Megjithatë plani qëndron në fuqi dhe bjondja në krye të diplomacisë së Brukselit do t’i shkojë Lulzim Bashës në zyrën e tij në PD dhe do t’i thotë se si është puna që po sulmohet ambasadorja Vlahutin. Më pas do t’i thotë se ajo personalisht dhe N/Sekretarja amerikane e Shtetit, Victoria Nulant “vunë fytyrën” në lojë për t’i dhënë opozitës 50 përqind të komisioneve të Vetingut në mënyrë që të largonte çdo alibi se Rama do të kapë drejtësinë.
Dhe në finale do t’i propozojë një plan të shkurtër për daljen nga kriza(çadra): zgjedhjet e 18 qershorit të administrohen nga BE dhe SHBA.
Kjo do të jetë oferta e Perëndimit për PD-në, e cila do të duhet të pranojë rolin bazik në zgjedhje të ambasadores së BE-së Vlahutin si njeriun që përfaqëson Brukselin. Ndryshe nuk do të ketë marrëveshje.
Këto pjesë e planit të axhendës së Mogherinit, bëhen të ditura për tesheshi.com nga një burim i rëndësishëm diplomatik në Tiranë.
Dhe pritet me interes ky zhvillim, pasi siç është bërë e qartë tashmë, protesta e opozitës e ka në shenjestër Vetingun. Deklarimet gati të hapura dhe pa asnjë ekuivok – siç ishte së fundi dhe qëndrimi i shprehur nga kreu i grupit parlamentar, Paloka – për një reformë absolutisht jo nga Edi Rama, e kanë kaluar atë në një tjetër plan ku zgjedhjet nuk janë më prioritet, ndonëse deklarohen si të tilla. Një tërheqje e opozitës, rrëzon veç cadrës edhe kauzën e Republikës së Re, si pjesë e të ashtëquajturit revolucioni demokratik. /tesheshi.com/
