Është quajtur operacioni “Devijimi”, pikërisht për faktin se gruaja e viktimës po tentonte devijimin e hetimeve. Dhe kështu, policia e Vlorës ka arritur të zbardhë të vërtetën e ngjarjes së pak javëve me parë, kur në afërsi të Pyllit të Sodës u dogj një banesë me brenda nënë e bir, Selkie dhe Olsi Hoxhallari, që të dy të shkrumbuar.
Pak orë më vonë nisën dyshimet se ata mund të ishin vrarë dhe pas javësh hetime intensive, është arritur në përfundimin se vrasës të tyre janë nusja e shtëpisë, autorët Hysnie Hoxhallari, 32-vjeçe, dhe Kasëm Pirjasi, 26 vjeç banues në Strum, Fier.
“Dy të arrestuarit në bashkëpunim me njëri-tjetrin, për motive të dobëta, kanë dhunuar e më pas kanë vrarë shtetasit O.H., e S.H., si dhe kanë shkaktuar zjarr në banesë me qëllim fshehjen e provave duke synuar për ta devijuar ngjarjen si “aksidentale”, thuhet në një deklaratë të Drejtorit të Policisë së Vlorës, Gentjan Shehaj.
Në cilësinë e provës materiale është gjetur dhe sekuestruar arma e ftohtë me të cilën dyshohet se është kryer krimi. Në fillim nënë e bir janë vrarë me atë armë e më pas i është vënë zjarri banesës për të humbur gjurmët. /tesheshi.com/
