Është zbardhur krimi i Dropullit tre ditë më parë, ku një çift të moshuarish minoritarë u gjetën të vdekur në banesë, goditur me mjete të forta.
Vrasësi i Kosta dhe Kleoniqi Ilia, 80 e 84 vjeç, është Thoma Mastora, 69 vjeç.
Sipas Policisë, shkak për vrasjen është bërë një konflikt i çastit që ka përshkallëzuar deri në përdorimin e sendeve të forta. Pasi i vrau, autori u largua prej aty duke e lënë çiftin të vdekur në banesë.
Drejtori i Policisë së Gjirokastrës, Ardian Çipa, përjashtoi pistën e vjedhjes në banesë.
“Nga këqyrja e vendit të ngjarjes, ambienteve të banesës dhe gjithë oborrit nuk u konstatuan shenja të vjedhjes apo të krijohej bindja se autorët mund të kishin ushtruar kontroll me qëllim gjetjen e vlerave monetare apo sende me vlerë që mund të posedoheshin nga viktimat”, tha Çipa në një deklaratë për mediat.
Raportohet se Thoma Mastora kishte pirë disa herë kafe në banesën e çiftit Ilia para ditës së krimit. Ng ana tjetër, thuhet se ai njihej në zonë si njeri problematik. Krimi ndodh në fshatin Bodrishtë. /tesheshi.com/
