Një ditë më parë u njoftua ndalimi i ish-deputetit socialist Eduart Ndocaj, pas denoncimit që kishte bërë një shtetas italian, që e akuzonte për mashtrim. Ish-deputeti u ndalua nga policia e portit në Durrës, për llogari të kolegëve të tyre në Lezhë. Por më pas ish-deputeti mohoi ngjarjen, madje postoi edhe një foto nga trageti duke udhëtuar drejt Italisë.
Ndërkohë sot është zbardhur kallëzimi i biznesmenit italian, Vincezo Riçi, që ka bërë ndaj ish-deputetit Eduard Ndocaj, të cilin e akuzon për mashtrim.
Në kallëzim, biznesmeni 64-vjeçar fillimisht tregon rrethanat e njohjes me Ndocajn.
“Gjatë vitit 2016, në mes të muajit mars jam njohur në Itali me shtetasin shqiptar Eduard Ndocaj nëpërmjet një kolegut tim italian me të cilin kisha njohje që quhet Ambrogio Pozzi, duke ma prezantuar si deputet në Parlamentin shqiptar dhe që kërkon një ndërmarrje që merret me shtrimin e tubacioneve të gazit. Pas këtij prezantimi unë kam vazhduar takimet me shtatasin Eduard Ndocaj, i cili më premtoj se qeveria shqiptare ka 50 deri 80 km tubacion për të shtuar, fliste në emër të qeverisë. Pas 2 javësh në këmbim të kësaj oferte më ka kërkuar një dhuratë e cila është automjeti Audi Q7, unë ja dhashë në përdorim”, ka rrëfyer Riçi, raporton TCH.
Po në kallëzim, biznesmeni Riçi denoncon se ish deputeti kaubojs fliste në emër të qeverisë.
“Dua të kallëzoj se shtetasit Eduard Ndocaj i kam dhënë 78 mijë euro kesh, pa përfshirë gjobat prej 8 mijë eurosh që ishte gjobitur në Itali për tejkalim shpejtësie. Këto sasi monetare mi kërkoj një muaj pasi më mori makinën. Më pati deklaruar se për të marrë këtë tender një nga përfaqësuesit e qeverisë kërkon 50 mijë euro ku 25 i kërkoi menjëherë dhe pjesën tjetër më tha me firmosjen e kontratës. Në atë moment unë i kam dhënë pa asnjë dokument 25 mijë euro dhe pas dy javësh edhe 25 të tjera. E kam pyetur vazhdimisht se kur do e fitojë këtë tender, por Eduardi me nxirrte vazhdimisht justifikime, dhe brenda harkut të 3 muajve ka marrë dhe pjesën tjetër prej 28 mijë eurosh”, vijon kallëzimi i italianit.
Eduard Ndocaj do të ndiqet në gjendje të lirë për akuzën e mashtrimit, ndërsa të martën ai postoi një foto në rrjetet sociale ku po udhëtonte drejt Italisë duke mohuar çdo akuzë.
Edhe avokati i Ndocajt reagoi duke u shprehur se klienti i tij i është nënshtruar një verifikimi policor sikurse mund t’i nënshtrohet çdo qytetar tjetër i lirë dhe në asnjë rast atij nuk i është hequr liria si person i ndaluar ose arrestuar. /tesheshi.com/
