KLD vendosi në mbledhjen e sotme që të analizojë informacionin e mbledhur nga Inspektoriati në lidhje me urdhërat e mbrojtjes që lëshohen nga gjykatat në vend në lidhje me dhunën në familje.
Analiza do të bëhet në mbledhjen e ardhshme dhe përmes saj do të nxirren konkluzione mbi proçedurat që ndjekin njerëzit e drejtësisë kur lëshojnë urdhërat e mbrojtjes ndaj viktimave të dhunës në familje.
“Bazuar në përcaktimet e rendit të ditës, anëtarët e KLD-së shqyrtuan raportin e Ministrisë së Drejtësisë mbi kryerjen e hetimit administrativ për verifikimin e procedurave të lëshimit të urdhrit të mbrojtjes nga Gjykata e Rrethit Gjyqësor Fier për shtetasen L.R. Duke mbajtur në konsideratë ndjeshmërinë që ka në opinionin publik fenomeni i dhunës në familje, Këshilli vendosi të kryej një inspektim tematik për gjyqtarin e Gjykatës së Rrethit Gjyqësor, Fier, E.S”, thuhet ne njoftimin zyrtar.
Më tej mbledhja vijoi me miratimin e programit të punës për përfundimin e vlerësimeve profesionale për periudhën 2010-2012. Gjithashtu, me konsensusin e anëtarëve të Këshillit u caktua Gerd Hoxha, si përfaqësues i Këshillit të Lartë të Drejtësisë në Komisionin Shtetëror për Ndihmën Juridike. /tesheshi.com/
