Pa kaluar as 24 orë nga takimi mes Ilir Metës dhe Lulzim Bashës, mësohen prapaskenat e bisedimeve që si qëllim duket se kishin futjen e opozitës në qerthullin e negociatave për reformën në Drejtësi dhe daljen si faktor politik relevant të kreut të LSI-së, i cili kishte kohë që qëndronte në hije.
Gjithçka ka nisur nga dita e enjte në darkë, kur papritur në faqen e internetit të Kuvendit u vendos Kalendari 3-javor, ku ishte futur edhe paketa e reformës në Drejtësi.
Një gjë kjo që irritoi opozitën e cila bëri gati padinë penale dhe akuzoi personalisht Edi Ramën si autor.
Por realisht Edi Rama nuk hyn fare këtu, pasi faqja e internetit të Kuvendit administrohet nga njerëz të besuar të Ilir Metës.
Kreu i Kuvendit, edhe pse tha se ishte një lapsus, nuk bëri të ditur se kush ishte fajtori që duhet të mbante përgjegjësi dhe që duheshin gjetur shkaqet. Kjo pasi vendimi nuk ishte marrë në Byronë Parlamentare, por thjesht u paraqit në faqe.
Pas kësaj, Ilir Meta, thirri ambasadorët ditën e premte në zyrën e tij për t’u paraqitur një plan negocimi “over time” me kreun e opozitës, Lulzim Basha.
Kreu i LSI-së e ofroi veten si negociator me opozitën dhe u tha ambasadorëve se kishte pasur kontakte paraprake me kreun e PD-së, Lulzim Basha.
Ambasadorët mësohet se kanë thënë se çdo akt negocimi do të ishte i mirëpritur, mjaft që politika shqiptare të miratonte reformën në Drejtësi.
Dhe pas kësaj, Ilir Meta shpalli publikisht kërkesën për takim me Bashën, kur çdo gjë e kishin biseduar paraprakisht.
Madje edhe vendi dhe ora e takimit, bashkë me mizanskenat e ditëlindjes, duke gjuajtur “me një gurë që vriste dy zogj”.
E para rifuste Lulzim Bashën në “tavë” pas përjashtimit që i bënë SHBA e BE si pasojë e kundërshtimit për të rënë dakord me kryeministrin Edi Rama, duke u kujdesuar madje që të zbusë një handikap politik që lideri i opozitës ka. Basha ka lindur në një ditë me Partinë Socialiste, më 12 qershor dhe ky fakt çdo vit i sjell urimin nga Edi Rama, ndërsa feston përvjetorët e PS-së.
Dje Ilir Meta i dhuroi trëndafila blu, pikërisht që të mos kujtohet roza apo mavija në një ditë që fati ia ka dhënë Bashës si pikë të përbashët me Edi Ramën.
Por përveç këtij detaji, më shumë anësor se thelbësor, vlen nisma e Kreut të Kuvendit për të marrë në dorë rolin e mediatorit dhe për të ushqyer ëndrrën presidenciale që e ka si variant, nëse i dështon mundësia e reprizës si kryeministër (variant që e dëshiron tepër).
Por ajo që është më e rëndësishmja dhe që llogaritet në rastin aktual të reformës në Drejtësi, nëse Ilir Meta bind Bashën për të votuar reformën, do të jetë kërkesa për “haraçin politik” të këtij suksesi.
“Haraç” që as më pak dhe as më shumë është Kryeprokurori i ri i Republikës, posti për të cilin po bëhet e gjithë gurguleja kundër reformës në Drejtësi, por që amerikanët dhe Edi Rama nuk duan t’ja japin kurrë Ilir Metës dhe Sali Berishës.
Mësohet se mbrëmë ka pasur një telefonatë mjaft të tensionuar mes kryeministrit Rama dhe kryekuvendarit Meta.
Ndërkaq, sot për herë të parë pas shumë kohësh, një delegacion zyrtar i LSI-së i kryesuar nga Ilir Meta dhe i përbërë nga Petrit Vasili, Ylli Manjani dhe Sokol Dervishi kanë shkuar në zyrën e Edi Ramës pikërisht pas takimit me Bashën.
Disa qarqe po e lidhin këtë takim me presionin final që do t’i bëjë Meta ramës për të marrë pazarin e lartë për reformën, ku në listë është dhe largimi i Saimir Tahirit.
Kryeministri ndodhet në defiëencë numrash, por deri tani nuk i ka pranuar presionet nga palët.
Sot priten zhvillime edhe më të vrullshme.
/tesheshi.com/
