Partia Demokratike nga dita e hënë nis aksionin politik në Kuvend,ku hapi i parë do të jetë depozitimi i kërkesës për ngritjen e një komisioni ad-hoc për reformën zgjedhore. Vëmendja e këtij komisioni do të jetë adresimi i problematikës së identifikuar në zgjedhjet e fundit parlamentare, si dhe aplikimi i votimit dhe numërimit elektronik në proçeset e ardhshme zgjedhore.
Demokratët pretendojnë se në marrëveshjen e 18 majit mes kreut demokrat Basha dhe kryeministrit Rama është e përcaktuar se në zgjedhjet pas 2017 do të aplikohet elektronika. Kjo do të thotë se demokratët ende shpresojnë në një zbatim rigoroz të marrëveshjes, megjithëse kreu i PD-së e cilësoi të vdekur nga salla e Kuvendit.
Burimet nga PD konfirmojnë se për reformën zgjedhore gjithashtu PD do të kërkojë një ndryshim të sistemit electoral, duke synuar kthimin e mazhoritarit, ku çdo deputet të ketë zonën e tij elektorale. Një tjetër propozim ka të bëjë me uljen e numrin të deputetëve, pasi për PD shifra 140 është shumë e lartë për numrin e popullsisë dhe janë shpenzime shtesë për buxhetin. Në këtë kuadër, burimet nga PD shprehen se do të kërkohet reduktimi në 100 ose 120 deputetë. Por për këtë duhet ndryshuar Kushtetuta, për të cilën demokratët janë të gatshëm të ulen në bisedime me socialistët, për realizimin e një reformë të plotë kushtetuese. Në vijim të kësaj, PD do të kërkojë një rishikim të ndarjes elektorale, pasi sipas tyre propozimi për sistemin mazhoritar kërkon një ndarje të re, bazuar në numrin e popullsisë.
Pra duket se partia më e madhe opozitare në vend po përgatitet për një sërë propozimesh drejtuar kryeministrit Rama, i cili nga ana e tij është shprehur i gatshëm të dialogojë me opozitën për gjithçka që është në interest të dy palëve dhe në funksion të qytetarëve.
Ndërkohë hapi i dytë që sërisht do të aplikohet gjatë javës së ardhshme është thërritja në Komisione dhe Kuvend të dy ministrave, Damian Gjiknuri dhe Arben Ahmetaj.
“Përveç kësaj ramë dakord që të thirren disa prej ministrave dhe të kërkohet informacion lidhur me strukturën e re të qeverisë, e cila duket qartazi që nuk është një strukturë që është ngritur për të funksionuar mirë qeveria, por një strukturë që siç e kemi thënë dhe në seancën e parë është ngritur vetëm me dy qëllime: së pari tu gjejë punë ish-bllokmenëve dhe pinjollëve të bllokut, dhe së dyti të ketë një strukturë sa më të përshtatshme që paratë e shqiptarëve të kalojnë pa shumë problem nga ato të dy ministrave kryesor që do të kontrollojnë paratë e gjithë shqiptarëve, nga xhepat e tyre në xhepin e Edi Ramës”, theksoi nënkryetari i Kuvendit, Edi Paloka.
Gjatë mbledhjes së kryesisë së grupit, Lulzim Basha kërkoi angazhim me kohë të plotë dhe jo të pjesshëm të deputetëve, ndërsa kërkoi përcaktimin e një kalendari mbi takimet e deputetëve me qytetarët, por edhe mbi përgatitjen e deputeteve për oponencën në Parlament. /tesheshi.com/
