Tashmë është e qartë nga mesazhi që shpërndau sot në Twitter, raportuesi për Shqipërinë në Parlamentin Europian, Knut Fleckenstein.
Ai pasi përkrah mesazhin e letrës së hapur të komisionerit Johanes Hahn për Shqipërinë, vë në dukje se ka pasur një qëndrim të përbashkët me SHBA për këtë qëllim dhe për fajtorët e situatës.
Fleckenstein përmend takimin në Uashington me senatorin John McCain, i cili është një nga figurat më të rëndësishme të Kongresit Amerikan dhe mazhorancës rrepublikane që po merret direkt me rajonin.
Pak kohë më parë, ai vizitoi të gjitha shtetet e Ballkanit përjashto Maqedoninë pikërisht për të ndaluar rrezikun rus.
Në një farë mënyrë Fleckenstein ka parashikuar atë që do të sjellë në Tiranë zyrtari i lartë i Departamentit të Shtetit, Hoyt Brian Lee.
Ai vjen në Shqipëri pikërisht pas mbylljes së protestës së Partisë Demokratike dhe sipas të gjitha gjasave, ai do të sjellë një mesazh përfundimtar dhe zyrtar të Uashingtonit për zgjedhjet e 18 qershorit.
Përpara vizitës së Hoyt Lee, ambasadori amerikan në Tiranë, Donald Lu, zhvilloi një takim me ish-kryeministrin Sali Berisha, i cili është faktor shumë me peshë në Partinë Demokratike.
Ambasada amerikane nuk shpërndau asnjë deklaratë për shtyp, kurse zyra e ish-kryeministrit Berisha bëri të ditur vetëm çfarë i ka thënë ky i fundit diplomatit të Uashingtonit.
Duket se nuk ka nevojë të tirren skenare misterioze, pasi nëse do të kishte një mesazh qoftë edhe me spond nga ambasadori ai do të bëhej i ditur nga Berisha. Enigmën e ka zgjidhur vetë Fleckenstein, i cili përveç Bashkimit Europian përfaqëson edhe Gjermaninë.
Eurodeputeti, në postimin e tij në Tëitter dërgoi mesazhin se SHBA dhe BE janë në një mëndje në lidhje me përgjegjësin e kësaj situate, që siç theksonte edhe Johannes Hahn, është udhëheqja e Partisë Demokratike, përkatësisht Lulzim Basha.
Ky i fundit, tashmë e ka të qartë se e ka nxjerrë veten jashtë sistemit dhe po ndërton një strategji që të rrëzojë sistemin, që nga rrëzimi i zgjedhjeve dhe më pas pushtetin që do të lindë nga 18 qershori.
Sipas të gjitha gjasave skenari i opozitës, megjithëse jashtë sistemit, nuk do të mundet të lëvizë në ujëra që mund të trondisin ekuilibrat, pasi këtë nuk do ta lejojnë amerikanët dhe Gjermania.
Më 5 Qershor, Mali i Zi do të pranohet zyrtarisht anëtar i NATO-s, ndërkohë më 25 maj në Bruksel, Edi Rama pritet të takohet me presidentin Trump gjatë samitit të krerëve të shteteve të Aleancës së Atlantikut të Veriut.
Ky samit do të ketë një theks të rëndësishëm në lidhje me ndalimin e ekspansionit rus në rajon. Çdo destabilitet do të ndalet që në lindje ashtu siç ndodhi në Shkup, kur zyrtari i lartë amerikan i përmendi presidentit maqedonas Gjeorgje Ivanov, se SHBA ka dijeni të plotë për të gjithë financimin e personave që morën pjesë në pushtimin e parlamentit. Pas kësaj Ivanovi u tërhoq.
A do të sjellë edhe në Tiranë një material të tillë Hoyt Brian Lee. Burime nga opozita bëjnë të ditur se biseda ndërmjet ambasadorit Lu dhe ish-kryeministrit Berisha është bërë pikërisht për çështjet e financimit të shumë aksioneve destabilizuerse duke u nisur nga Kavajë.
Në fshehtësi, policia ka bërë disa ndalime personash, të cilët më pas janë liruar dhe siç mësohet ka pasur deponime të disa prej njerëzve që kanë marrë pjesë në trajnime që janë kryer nga ish-drejtues të policisë së shtetit që janë sot me opozitën.
Dhe ka shumë gjasa që pikërisht ky do të jetë mesazhi i zyrtarit të lartë të DASH.
Sot një mesazh të fortë dha edhe OSBE e cila në një postim në faqen zyrtare theksoi se “E drejta për t’u mbledhur në mënyrë paqësore është një prej themeleve të demokracisë. Në Shqipërinë e vitit 2017 nuk ka vend për dhunë”.
Por megjithatë, mesazhi i Hoyt Lee, apo thënë më ndryshe masa e ashpërsisë së tij do të varet nga ajo çka do të ndodhë sot e nesër në bulevardin Dëshmorët e Kombit.
Një sinjal u dha nga Lulzim Basha sot që shpalli mbylljen e çadrës, por paralajmëroi se “nësër rrëzohet Republika e Re”. Çfarë do të shpallë ai? Ndërkombëtarëve u ka thënë që do të anoncojë mosbindjen civile, por asnjë prej diplomatëve nuk i di ende detajet e kësaj mosbindjeje…
/tesheshi.com/
